25 ka scholars nakapahimulos sa  “Project Palangga” sa PNP

CEBU, Philippines —  Dungan nga gilusad ang hiniusang programa sa Police Regional Office 7 (PRO-7) ug National Police Commission 7 (NAPOLCOM-7) nga gitawag og 'Project Palangga' niadtong Biyernes, Hulyo 21 sa PRO-7 Multi-Purpose Hall, Camp Sergio Osmena Sr., Cebu City diin 25 ka mga PRO7 scholars ang nakabenepisyo. 

Kini maoy kabahin sa nagkalain-laing aktibidad nga gitakda alang sa pagsaulog sa 28th Police Community Relations Month nga nagpalambo sa mas lig-on nga pag-apil sa ubang mga ahensya sa gobyerno ug sa publiko sa trabaho sa kapolisan aron mas epektibo ang pagsumpo sa krimen. 

Gibanabana nga 25 ka mga PRO-7 scholars ang nakabenepisyo sa maong paningkamot ug kini nga mga iskolar mao ang mga anak sa namatay ug mga nabaldado nga mga sakop sa kapolisan.

Giapod-apod usab ang mga food packs, ug school supplies gikan sa PNP, NAPOLCOM 7, ug ubang partner agencies.

Ang “Project Palangga” orihinal nga gimugna sa NAPOLCOM 7 sa pakigtambayayong sa PRO7, LGUs, ug uban pang stakeholders aron mahatagan og pag-atiman, suporta, ug serbisyo ang mga naluwas nga mga anak sa mga namatay nga bayani sa serbisyo.

Ang pangan nga “Project Palangga” nagtumong sa pagpakita sa mga benepisyaryo niini nga ang gobyerno isip mga ginikanan sa katawhan anaa aron sa pag-atiman kanila isip magbalantay ug tigpanalipod.

Si Police Brigadier General Anthony Aberin, PRO7 Regional Director nagkanayon nga ang Project Palangga miila sa kaisog ug bayanihong buhat sa mga ginikanan sa maong mga bata atol sa ilang pagserbisyo sa PNP organization.

Kini nga buluhaton maghatag ug tibuok kinabuhi nga tabang sa edukasyonal nga panginahanglan sa ilang mga anak. Dugang ni Aberin nga ang pagpalig-on sa pakigtambayayong sa kapolisan ug komunidad usa ka importanteng bahin sa pagpatin-aw sa papel sa PNP isip mga tigtukod ug mga ambassador sa komunidad. CNU Intern, Decemay Padilla/MEL