Focus crimes sa nasud nikunhod og 10.15 porsyento

CEBU, Philippines — Mikunhod og 10.15 porsyento ang walo ka focus crimes sa nasud sulod sa unang semestre sa 2023 sugod sa Enero hangtod Hunyo base sa natala sa Philippine National Police (PNP) niadtong Lunes Hulyo 17, 2023.

Base sa datos nga gihatag sa Crime Information Reporting and Analysis System (CIRAS) mikunhod ngadto sa 18,560 ka kaso sa 2023 gikan sa 20,657 ka kaso sa 2022 nga nagtimaan sa pagkunhod sa 2,097 ka kaso o 10.15 porsyento.

Dugang niini ang kasagaran nga focus crimes monthly crime rate mikunhod sa 10.13 porsyento gikan sa 3.06 sa 2022 ngadto sa 2.75 sa 2023. Namatikdan nga ang murder mikunhod sa 1.89 porsyento, physical injury sa 20.01 porsyento, pagpangawat sa 9.33 porsyento, ug rape sa 18.19 porsyento. Bisan adunay gamay nga pagsaka sa homicide ug robbery dakong pagkunhod ang naobserbahan sa mga kaso sa carnapping.

Mapasalamaton si PNP Chief Police General Benjamin Acorda Jr. sa talagsaong paningkamot sa PNP personnel sa pagkab-ot niining dakong pagkunhod sa focus crimes.

Sa laing bahin nadakpan ang usa ka guwardiya nga nag-sideline og pamaligya og shabu sa buy bust operation sa Presinto 3 sa Mandaue City Police Office (MCPO) sa miaging gabii. Si Police Captain Emmanuel Rabaya, hepe sa Presinto 3 miila sa suspetsado nga mao si John Arvin Abano, 28 anyos taga Paknaan Siyudad sa Mandaue.

Nakuha nga ebidensiya mao ang 15 ka pakete nga shabu nga nagkantidad og P4,500,00.

Samtang gipahalipayan sa kapolisan sa Dakbayan sa Talisay ang sakop sa City of Talisay-Traffic Operation Development Authority (CT-TODA) nga nakadakop og esnatser niadtong milabay nga semana didto sa Barangay Tabunok.

Si Dan Cliffors Labora midawat sa iyang sertipiko uban sa bugas nga ayuda gikan ni Police Lt. Col. Randy Caballes, hepe sa kapolisan ug ni Cyril Velasco, chairman sa City Advisory Council (CAC). Si Caballes niila sa lihok nga gipakita ni Labora nga migukod sa esnaster nga nailhan nga si Rarioyn Pat Pepito, 19 anyos.

Si Pepito mikuha sa cellphone ni Leo Santos Jr. samtang naglakaw kini sa dalan. —Romeo T. Limpangog, Gabriel C. Bonjoc (BANAT NEWS)