Pilot project sa DSWD nga food stamp sugdan ugma

CEBU, Philippines — Subay sa programang Walang Gutom 2027 ubos sa administrasyon ni Presidente Ferdinand 'Bongbong' Marcos Jr. , gisugdan na sa Department of Social and Welfare Development (DSWD) ang pilot project niini nga food stamp program karong umaabot nga Martes, July 18, 2023 didto sa Tondo, Manila.

Sa pagkakaron, 50 ka pamilya lang una ang apilon sa pilot project gikan sa 3 mil nga orihinal nga plano sa tuyo nga ma-monitor kini og maayo.

Si DSWD Secretary Rex Gatchalian nagkanayon nga ang programa anaa pa sa pilot run aron tun-an ang kaepektibo niini usa pa magdugang og 300,000 ka pamilya kada tuig hangtud maabot ang target nga usa ka milyong pamilya.

Ang trial project modagan sulod sa unom ka bulan alang sa 3,000 ka mga pamilya nga adunay binuwan nga kita nga 8,000 paubos matag bulan.

Ang DSWD adunay pundo nga $3-million gikan sa Asian Development Bank (ADB) ug uban pang development partners nga gamiton para niini.

Ang kwalipikadong mga pamilya makadawat og electronic benefit card nga adunay food credits imbes nga cash diin magamit nila kini sa mga akreditado nga retailers, sama sa mga tindahan sa Kadiwa, grocery stores, ug gagmay nga mga supermarket.

Apan dili kini dole out lang, kinahanglang motambong ang mga benepisaryo sa nutrition development classes aron sila matudloan bahin sa hustong pagpili og pagkaon ug pag-budget sa ilang kwarta.

Apil sa itudlo kanila mao ang mga kombinasyon sa  menu sa pagkaon nga maampingong gihimo sa Food and Nutrition Research Institute (FNRI).  Ang 50 porsyento sa menu carbohydrates, 30 porsyento ang protina, ug 20 porsyento mga  good fats.

Gilaoman sa DSWD nga ang mga partisipante nga nakapauswag sa ilang nutritional intake madasig sa pagpangita og trabaho.

Ang DSWD nakigtambayayong sab sa Technical Education and Skills Development Authority (TESDA) aron mahatagan ug reskilling opportunities ang mga  benepisaryo aron sila makakita og trabaho.

Ang programa dili ra alang sa mga pamilyang kabus sa pagkaon apan nagtinguha usab sa pagsuporta sa mga lokal nga mag-uuma pinaagi sa pagsiguro nga ang ilang mga produkto mapalit sa mga benepisaryo imbes nga mausik. — CNU Intern/IBM (BANAT NEWS)