Inflation rate sa Pilipinas hinay-hinay nga mius-os

CEBU, Philippines — Padayong mius-os og hinay-hinay ang inflation rate o pagtaas sa presyo sa mga palaliton sa Pilipinas gikan sa 6.1 porsyento sa Mayo 2023 ngadto sa 5.4 porsyento sa Hunyo 2023 base sa datos nga gipagawas sa Philippine Statistics Authority (PSA).

Kini ang ikalima nga sunud-sunod nga bulan sa paghinay sa katibuk-ang inflation gikan sa kinatas-ang 8.7 porsyento sa Enero ning tuiga ug ang pinakaubos sa miaging 13 ka bulan.

Ang kasagaran nga inflation rate sa unang semester sa 2023 niabot sa 7.2 porsyento.

Kahinumdoman nga sa niaging tuig 2022 bulan sa Hunyo, ang inflation rate mas taas sa 6.1 porsyento.

Ang pag-us-os sa presyo sa pagkaon ug mga produkto sa petrolyo maoy nag-unang hinungdan sa paghinay sa katibuk-ang inflation sa nasud sa buwan sa Hunyo.

Ang inflation alang sa pagkaon ug dili makahubog nga ilimnon mihinay gikan sa 7.4 porsyento sa Mayo ngadto sa 6.7 porsyento sa Hunyo, ug ang transportasyon gikan sa -0.5 porsyento ngadto sa -3.1 porsyento samtang ang presyo sa gasolina ug diesel mius-os pa.

Sa National Capital Region (NCR), ang inflation mius-os gikan sa 6.5 porsyento niadtong Mayo ngadto sa 5.6 porsyento sa Hunyo samtang sa mga lugar gawas sa NCR, ang inflation mius-os gikan sa sayes porsyento ngadto sa 5.3 porsyento.

Ang MIMAROPA Region nakarehistro sa labing taas nga inflation rate sa mga rehiyon nga nagpabilin sa 7.2 porsyento sa Hunyo, sama sa buwan sa Mayo. Samtang ang Cordillera Administrative Region (CAR) adunay pinakaubos sa 3.2 porsyento sa Hunyo gikan sa 3.9 porsyento sa Mayo.

Apan ang year-to-date inflation anaa sa 7.2 porsyento nga mas taas pa sa target sa gobyerno nga dos porsyento ngadto sa kwatro porsyento. — /MEL (BANAT NEWS)