Liga ng mga barangay nipasiugda og mobile blood donation

CEBU, Philippines — Ang Liga ng mga Barangay-Cebu City gipangulohan ni Kapitan Franklyn Ong sa Barangay Kasambagan nipasiugda sa upat ka batch nga “Dugo Mo Kinabuhi Ko” mobile blood donation niining ulahi lang diha sa Barangay Bonbon, usa sa mga bukirang barangay sa Dakbayan sa Sugbo.

Nasayran nga 46 ka tawo ang gi-recruit isip mga blood donor ang nakaapil sa maong programa ug naggikan kini sa mga barangay sa Bonbon, Buot, Tabunan, Sudlon 1 ug 2.

Nasayran nga opisyal nga gisugdan ang mobile blood donation nga programa kaniadtong Mayo 13 didto sa Barangay Pit-os.

Niabot ngadto sa 43 ka bag nga dugo ang nakolekta sa maong kalihokan diin ang mga donor niini naggikan sa mga barangay sa Pit-os, Mabini, Adlaon, Sirao, Paril, Agsungot ug San Jose.

Gisundan dayon kini sa laing batch nga gipahigayon diha sa Barangay Cogon Ramos ug ang ikatulong batch sa Barangay Guadalupe.

Ang maong kalihokan adunay tagline nga "Donate Now, Save Lives" tumong niini nga mas daghan pa ang matabangan nga nanginahanglan og dugo.

Gidasig nga  mamahimong bayani ang tanan pamaagi sa pagluwas pa og daghang kinabuhi.

Ang maong kalihokan ubos usab sa pakigtambayayong sa Department of Health-7 ug Cebu City Health Department. (BANAT NEWS)