Amerkano nasakpang nangawat og gripo
CEBU, Philippines — Gibalhog sa prisohan ang usa ka Amerikano nga gipasanginlang nasakpang nangawat sa usa ka mall sa Barangay Talamban sa Siyudad sa Sugbo niadtong Huwebes sa gabii, Hunyo 29,2023.
Ang suspetsado giila nga si Jeremiah Michael Stevenson, 37, lumad nga taga Los Angeles, California, USA kasamtangan nagpuyo sa Cabantan St., Brgy. Luz, sa Siyudad sa Sugbo.
Si Police Major Janelito Marquez, hepe sa Talamban Police Station miasoy nga ang suspetsado nasakpang nanguha og tulo ka mahalon nga gripo sa tubig nga nagkantidad tanan og P9, 989.25 nga wala niya bayari.
Gikatahong midiretso lang kini og gawas sa mall nga wala mobayad hinungdan gidakop kini sa CI nga si Christian Canete Eleptico ug gwardiyang si SG Protacio Eder Conge.
Nasuta sa gipalawmang imbestigasyon, nahibaw-an nga nadakpan na usab sa downtown area si Stevenson nga nanguha usab og gripo sa usa ka tindahan niadtong Mayo 5,2023.
Mismo si Police Major Efren Diaz, hepe sa Waterfront Police Station diin nasakop ang tindahan nga gikawatan kaniadto ni Stevenson, mikompirmar sa gibuhat niini adtong Mayo.
Ang suspetsado pasakaan og kasong pagpangawat. Dannahli Pogado, CNU Intern/IBM (BANATNEWS)
- Latest