Tulo ka bike repair stations gitukod diha sa mga lugar Mandaue

CEBU, Philippines —  Tulo ka bike repair stations ang gibutang diha nagkadaiyang dapit sa Dakbayan sa Mandaue ug kaabag sa lokal nga kagamhanan niini mao ang  Mandaue Chamber of Commerce and Industry  uban sa  pakigtambayayong sa Visayan Electric Company ug Vivant Foundation .

Ang gitukod nga bike repair stations nahimutang diha sa Cebu Home and Builders Center sa Barangay Banilad, Mandaue City Public Market sa Barangay Centro, ug sa Atlantic Hardware sa Barangay Subangdaku.

Ang kagamhanan sa siyudad maoy nipili og mga dapit nga anaa sa mga dagkong karsada.

Ang maong repair stations gitukod isip suporta sa ordinansa sa siyudad nga giulohan og, “Providing for the Comprehensive Rules and Regulations in the Operation of Bicycle Systems in the City of Mandaue” nga gipalabang niadtong Disyembre 2020.

Ang ordinansa naghatag og gibug-aton sa pagpalambo sa bike lane networks ug sa paghatag og bike racks ug repair stations sa lokal nga kagamhanan ug pribadong sektor.

Atol sa turnover ceremony sa niaging adlaw si Mandaue City Vice Mayor Glenn Bercede nagpasalamat sa pribadong sektor sa pagsuporta sa Mandaue City Government.

Sa samang kalihokan, gidayeg ni Vivant Foundation Inc. Executive Director Shem Jose Garcia ang Mandaue LGU alang sa pagsugod sa proyekto ug sa pagtugot sa mga negosyo sa pagtampo sa pagpakunhod sa epekto sa global warming.

Samtang si Visayan Electric President ug COO Raul Lucero nagpasalamat sa Mandaue LGU ug sa private sector partners alang sa aktibong pakigtambayayong aron  matuman ang bike repair stations project.

Nitambong usab atol sa maong kalihokan ang CEO sa Cebu Home and Builders Center Michael Co, Mandaue Chamber of Commerce and Industry President Kelie Ko,  mga representante gikan sa kagamhanan sa Dakbayan sa Mandaue. BDB (BANATNEWS)