Probe wa moundang sa clearing operation sa siyudad

CEBU, Philippines — Nagpadayon ang gihimong clearing operation sa mga lugar sa dakbayan sa Sugbo nga adunay illegal nga mga estraktura nga nakahatag og dili maayo nga talan-awon ug kahuot sa mga dapit.

Kini ang gipahibawo sa OIC sa Prevention Restoration Orderly Beatification and Enhancement Team kon PROBE nga si Aderson Comar.

Matud pa ni Comar, walay hunong ang ilang pagpanglimpyo ug pagpahigayon sa clearing sa pipila ka dapit sama sa F. Ramos, Lorega, Duljo Fatima ilabi na kadtong nakalapas sa 3-meter easement ug sa mga sidewalk.

Hinoon iyang giangkon nga dunay mga lugar nga dili madali dali sa paghawan tungod kay nagkinahanglan kini ug court order.

Apan kadtong mga movable nga mga structure gipahimangnuan nila ang mga nanag-iya sa paghipos niini apan kun mag magahi gayud ang mga tag-iya mapugos sila sa pagguba niini.

Dugang pa ni Comar nga 24 oras ang ilang gihimo nga pagpanglimpyo sa kadalanan ug sa mga dapit subay sa mandato nga gitahas kanila ni Mayor Michael Rama.

Subay niini iyang gi-awhag ang katawhan nga mosibog nalang sa ilang mga butang ilabi na kadtong nakabalda sa agi-anan. (BANAT NEWS)