Tuburan padayong nipalambo sa tourist spots
CEBU, Philippines — Hinay-hinay na nga nibangon ang turismo sa Lungsod sa Tuburan diin pipila ka tourist spots ang padayon pa karong gipalambo ug gipanindot.
Kini ang gibutyag ni Rennyl But, designated tourism officer sa lungsod.
Matud ni But nga padayon ang ilahang planning sa tourism office ug karong adlaw’ng Doming laing tourism destination sa dapit ang buksan nga tawagon og 360view Restaurant and Coffee Shop nga nahimutang diha sa Barangay Kabangkalan sa maong Lungsod.
Gihulagway ni But nga ang konsepto niini mao ang agri-tourism area gikan sa uma ngadto na sa lamesa diin dili lang ang magpapatigayon ang mabulahan apil na usab ang mga mag-uuma.
Gibutyag ni But nga sama sa Molobolo Spring hingpit na kining gibuksan sa publiko niadtong May 21, 2023 human sa duha ka tuig nga gisirado sa publiko tungod kay gipalambo ug gipanindot kini.
Giingong ang Tuburan anaa karon sa dul-an sa 90 porsyento sa ilang tourism tungod kay aduna pay daghang gipalambo ang kagamhanan sa lungsod.
Andam na usab ang lungsod nga modawat og mga international guest.
Sa iyang bahin, si Mayor Democrito “Aljun” Diamante nibutyag nga daghan na ang mosuroy diha sa ilang lungsod dili lang sa ilang mga tourism site apan lakip na usab sa ilang mga merkado ug Tuburan coffee.
Mapasalamaton ang mayor sa mga Sugbuanon sa pagsuporta usab sa mga produkto nga tatak iyaha sa Sugbo.
Gibutyag usab ni Diamante nga matag tawo nga mosuporta sa produkto nga Sugbuanon dili lang negosyante ilang gitabangan apan lakip usab ang mga mag-uuma. — BDB (BANATNEWS)
- Latest