Pelare: 87 porsyento sa insidente sa pagpamusil nasulbad na
CEBU, Philippines — Niabot ngadto sa 157 ka shooting incidents nahitabo sa Central Visayas gikan sa buwan sa Enero hangtud karong buwana apan 87 porsyento niini ang nasulbad na o cleared na.
Kini ang gitug-an ni Police Lieutenant Colonel Gerard Ace Pelare, tigpamaba ni Police Brigadier General Anthony Aberin sa Police Regional Office-7.
Matud ni Pelare nga nakatala sila og 157 ka shooting incidents diin kasagaran niini sa Cebu City apan 87porsyento sa maong gidaghanon ang nasulbad na o cleared na.
Si Pelare nagkanayon nga 13 porsyento o 20 lang ka shooting ang under investigation karong mga panahon ang padayon pa nila nga gitutokan.
Gibutyag ni Pelare nga adunay higayon nga dili mapugngan ang krimen tungod kay ang mga kriminal mangita og higayon nga dili madakpan hinungdan nga padayon ang ilang gihimo usab nga crime prevention ug giawhag nila ang katawhan nga motabang usab sa kapolisan aron gamay ang oportunidad sa mga criminal nga mohimo og krimen.
Si Pelare nagkanayon nga ang shooting incidents nga nahitabo isolated lang tungod kay kasagaran sa mga hinungdan sa pagpamusil kalabot sa personal nga bangi o ilegal nga drugas.
Dugang ni Pelare nga luwas gihapon ang Sugbo ug dili angay mabalaka ang katawhan. (BANAT NEWS)
- Latest
