Drayber sa e-bike gipatay sa bana sa iyang ka relasyon?

CEBU, Philippines — Napalgang wala nay kinabuhi ang usa ka drayber sa e-bike kagahapon sa buntag diha sa Bascon, Street, Barangay Dumlog Dakbayan sa Talisay.

Ang biktima nailhan nga si Germelino Callao, 43-anyos, lumad nga taga Negros Oriental ug kasamtangang nagpuyo diha sa Sitio Bahala, Barangay Dumlog.

Ang suspetsado mao si Julieto Jaranilla, hingkod ang panuigon, usa usab ka drayber sa e-bike ang nitahan sa iyang kaugalingon ngadto sa kapolisan sa siyudad.

Ang mga sakop sa Talisay Rescue Emergency Team (TREAT) niresponde sa alarma ug nakita nga wala nay kinabuhi si Callao.

Si Callao adunay mga bun-og diha sa nagkadaiyang parte sa iyang lawas.

Si Marie Briones, kapuyo ni Callao nibutyag nga niadtong Martes sa gabii niuli ang naulahi uban sa gihinganlan og “Linda” nga kauban usab sa biktima nga drayber sa e-bike.

Giingong si Linda gibun-og kini sa iyang bana ug nihangyo na anha una matulog sa balay nila ni Callao.

Matud ni Briones nga nisugot siya sa hangyo ni Linda tungod kay naluoy siya niini.

Pagka-alas 2:00 kagahapon sa kadlawon nananghid nga mopauli si Linda ug gihatud kini ni Callao.

Matud ni Briones nga ang bana ni Linda nianha sa ilaha og nangita sa iyang asawa ug nabantayan niya nga aduna kini gibitbit nga gahi nga butang.

Si Briones nagkanayon nga diha na siya nakahibawo gikan sa ilang mga silingan nga ang iyang kapuyo napalgan kini nga wala nay kinabuhi.

Ang suspetsado nipasangil nga sulod na sa upat ka buwan nga adunay relasyon si Melinda ug si Callao.

Ug giingong dihang mamasahero na unta siya nianang kadlawon iyang nakit-an ang iyang asawa nga nigawas sa pinuy-anan sa biktima dala ang bag ug ang ilang 5-anyos nga anak.

Ang suspetsado nangangkon nga iyahang nga gigukod ang biktima ug ang iyang asawa ug dihang iyang naabtan iyang gibunalan og tukod sa payong ang biktima hinungdan sa ilang sinukmagay.

Iyang nabantayan nga nisibat ang iyang asawa hinungdan nga gibiyaan niya ang biktima ug gigukod ang iyang pamilya.

Nisunod ang biktima kanila apan iyang nabantayan nga giatake kini ug wala niya gitabang. —Rowena D. Capistrano (BANATNEWS)