Usa ka kilong shabu nasakmit gikan sa plea bargainer
CEBU, Philippines — Imbes makunhoran ang sentensiya sa usa ka plea bargainer mas mobug-at na hinuon ang iyahang kaso tungod kay nadakpan kini sa mga sakop sa Philippine Drugs Enforcement Agency (PDEA)-7 ug nakuhaan og usa ka kilo nga shabu nga nibalor tanang ngadto sa P6.9 milyones atol sa buy-bust operation niadtong Martes sa gabii didto Canday-ong, Dumaguete City, Negros Oriental.
Ang suspetsado mao si Fernando Saraga, 54-anyos, walay trabaho ug usa ka plea bargainer.
Ang mga operatiba sa PDEA-7 Regional Special Enforcement Team, PDEA Negros Oriental Provincial Office ug Dumaguete City Drug Enforcement Unit nakakompiska gikan sa suspetsado og upat ka putos nga shabu nga nitimbang tanan ngadto sa P1,015 gramos, buy-bust money ug drug paraphernalia.
Ang mga otoridad nakadawat og taho kalabot sa ilegal nga kalihokan sa suspetsado hinungdan nga gipanid-an nila kini sulod sa unom ka buwan ug nasayran nga maka-dispose kini og usa ka kilong shabu sa matag semana.
Ang suspetsado nadakpan kini niadtong tuig 2012 tungod sa pagkalambigit niini sa ilegal nga drugas ug nipaubos sa plea bargain ug nakagawas niadtong tuig 2016. (BANATNEWS)
- Latest
