76 balay sa Talisay naugdaw

CEBU, Philippines — Miabot sa 76 ka panimay ang nasunog sa Purok Sambag, sa Barangay San Roque, Syudad sa Talisay niadtong Lunes sa gabii, duna pay tulo ka bata nga nataligam-an ug maayo nalang nga nabantayan sa usa sa mga residenteng nitabang pagpawong sa kalayo ug nadala sila sa gawas.

Si Fire Chief Insp. Alvin Torion, fire marshal sa siyudad nibutyag nga nadawat nila ang alarma alas 10:42 sa gabii apan naabot kini og third alarm pagka 11:14 sa gabii tungod sa kalisod pagsud sa lugar.

Ang nasunogan daplin ra unta sa karsada ug dunay mga karsada sa sulod  apan pwerteng gagmaya ug lisod makasud ang mga firetrucks.

Duha ka andana nga panimay ang unang nasunog nga gipanag-iya ni Rona Donguines nga gipuy-an nila ni Rheinell Tobias, Amelita Orellosa ug Yolanda Ramires Donguines.

Usa ka Athena Donguines, 4 anyos, ang matud pa nasamdan, kinsa usa sa nasalbar ni Leo Niez, 34, kinsa nipatong sa atop aron pagtabang pagpawong sa kuryente human nagtuo kining kuryente ang hinungdan.

Sa dihang padung na unta siya og biya nakadungog kini og hilak sa mga bata hangtud nga iyaha kining nakit-an sa usa ka balay. Pugsanon niyang giguba ang bintana og gipalusot ang mga bata ug gipakatkat sa atop.

Ang mga tawo sa lugar mao nay nitabang nilang tanan nga makanaog hinungdan sa kalipay sa mga residente.

Samtang nakuryentihan sab ang usa ka  Donmark Nebrida, 22, samtang kini nagdali og hakot sa ilang mga butang.  Maayo nalang gani kay nakit-an kini nga nagkurog-kurog ug dali nga gitabang. Lain sab ang nasamdan nga mao si Frederick Utos, 43 anyos.

Matud pa ni Torion nga nakontrolar nila ang kayo mga alas 11:39 sa gabii.

Ilang gitan-aw ang electrical wiring o ba kaha substandard nga appliances maoy sinugdanan sa sunog. Gibana-bana nga moabot sa P625 mil ang danyos sa sunog.

Si Kapitan Jun Cabrera sa San Roque nipahiluna sa mga apektadong pamilya sa ilang basketball gym ug sa eskwelahan.

Asoy pa niya nga gitabangan sila sa pagpakaon sa mga pamilya sa taga City Social Welfare and Development (CSWD).

Nanawagan sab siya kung kinsa kadtong adunay malumo nga kasing-kasing nga makahatag og tabang sa mga nasunogan.

Kalab-anan sa mga residente ang nitug-an nga wala gayud silay nabitbit nga mga gamit ug bugtong gisiguro ang ilang kaluwasan tungog sa kahagip-ot sa dapit.

Tinguha ug pangindahay sa mga residente nga makabalik pa sa maong lugar ilabi na nga giingong gipanag-iya ang yuta og pribadong tawo.

Si Felipa Solana, ang pangulo sa DSWS sa siyudad nitug-an manghatag sila pg pagkaon sa mga nasunogan udto sa adlaw nga Martes hangtud sa Biyernes sa buntag.

Tinguha usab nila Solana nga mahatag ang financial assistance sa mga nasunogan karong Biyernes nga P15 mil sa mga nanag-iya samtang, P10 mil sa mga nag-abang ug P5mil sa sharer.— Rowena Capistrano (BANATNEWS)