Drug dens sa Tisa gironda, 12 nadakpan

CEBU, Philippines — Moabot sa 12 ka tawo ang nadakpan sa tulo ka simultaneous buy-bust operations sa nagkalain-laing Sitio sa Barangay Tisa, Dakbayan sa Sugbo niadtong Biyernes, Pebrero 4.

Si Leia Alcantara, tigpamaba sa Philippine Drug Enforcement Agency (PDEA)-7 miingon ang mga operatiba nakakuha og 123 gramos nga gituohang shabu nga mobalor og P836,400 ug duna say mga drug dens nga ilang giguba.

Ang unang operasyon nahitabo alas 4:30 sa hapon niadtong Sabado sa Sitio Lutaw-Lutaw, Barangay Tisa diin ang mga operatiba sa PDEA-7 miguba sa drug den ug midakop sa pito ka indibidwal apil na ang giingong tigmentinar sa drug den.

Giila sa PDEA-7 ang giingong drug den maintainer nga si Antonio Laput, 42, ug ang laing unom nga bisita sa drug den nga sila si Mary Jane Medce, 22; Marites Geoman, 24; Ronnie Saleno Jr., 44; managsuong Tereso, 41, Wesley Villaver, 50, ug Ricky Villaver, 31.

Nakompiskar sab ang tulo ka packs sa gituohang shabu nga mitimbang og 13 grams ug mokantidad og P88,400.

Pagka alas 6:30 sa samang adlaw, laing team sa PDEA-7 ang nagpahigayon og buy-bust operation sa Purok 3, Pag-iisa sa mao gihapong barangay nga miresulta sa pakasikop nila ni Marlon Saballa, 40, usa ka Tattoo artist ug Neco Saballa, 24.

Nakuhaan sila og duha ka paketeng gidudahang shabu nga motimbang og 50 grams ug nagkantidad og P340,000 ug paglabay sa napulo ka minutos tulo sab ka indibidwal ang nadakpan nga nakuhaan og 60 grams sa shabu nga nagkantidad og P408,000.

Ang operasyon gihimo sulod sa usa ka gidudahang drug den diin nadakpan ang drug den maintainer ug tag-iya sa balay nga si Wayne Godinez, 25, ug ang igsuon niini nga si Wendel, 18, ug usa ka George Caburnay, 18.

Ang mga dinakpan nagtingkagol karon sa holding facility sa PDEA-7 samtang giandam ang pagpasaka og kaso batok sa mga dinakpan.

Sigon ni Alcantara ang pagguba sa drug den importante sa pagpatunhay sa kahapsay ug kalinaw sa barangay.

Matud pa niya ang Barangay Tisa usa sa gikonsiderar nga drug-affected barangay sa Cebu City gumikan sa presensiya sa drug dens. Hinoon si Alcantara miingon nga ang Barangay Anti-Drug Council aktibo sa ilahang functions sa pagtubag sa illegal drug activity.

Gani ang maong malampuson nga operasyon nagagikan sa reports nga nadawat sa ilang buhatan gikan sa concerned citizens inabagan sa intelligence networks.

Nasayran nga mao na kini ang ikalima ug ikaunom nga drug dens nga giguba sukad sa pagsugod ning tuiga. — /IBM (BANAT NEWS)