Mga gubaon nga traffic light sa Minglanilla gitangtang

CEBU, Philippines — Gipangtangtang na ang mga gubaon ug karaan nga traffic lights diha sa kadalanan sa Lungsod sa Minglanilla.

Ang pagtangtang sa maong mga traffic light gipahigayon niadtong Domingo sa gabii diin mingaw ug dili mabalda ang dagan sa trapiko.

Si Mayor Rajiv Enad sa post niini sa iyang Facebook page nipahibawo nga ilisdan na nila og bag-ong mga traffic light ang upat ka dagko nga eskina nga naglangkub sa Tungkop, Poblacion, Calajoan ug Tungkil.

Ilakip usab nila og instolar ang tulo ka gagmay nga eskina nga naglangkub sa Abono, kilid Gaisano ug Pakigne.

Mabantayan nga usa ang Minglanilla sa mga lugar diin magdasok ang mga sakyanan. Hinuon ang command center sa lungsod nagamit na ug daghan na sa mga panghitabo nga nakatabang og dako ang kuha nga footage sa mga Close Circuit Television (CCTV) camera. (BANATNEWS)