Nangalanag sa kasag

CEBU, Philippines — Gituohan nga nalanag sa kasag o sa hugaw tubig nga ilang giinom ang gitutukan sa mga otoridad sa Daanbantayan bahin sa pagkalandig sa lima ka mga batang nagpangidaron 5- anyos ngadto sa unom pa ka buwan sa tambalanan, laing duha usab ang nakalas.

Ang mga bata mga molupyo sa Sitio Sampero, Barangay Tapilon sa maong lungsod sa Daanbantayan. Matud pa ang insidente nahitabo niadtong Miyerkules sa gabii nga niresulta sa kamatayon sa 2- anyos ug laing bata nga usa pa ka tuig.

Matud pa ni Kapitan Mowy Luche, sa Barangay Tapilon, nakadawat siya ug tawag gikan sa Barangay Health Worker ug Community Development Worker nga dili layo sa panimalay nga gipuy-an sa pamilya Jelly ug Victor Alce.

Sumala pa ni Luche, Miyerkules sa buntag giingong nanginhas ang amahan sa mga bata ug pagkahapon na naluto sa anak niini nga 17-anyos. Hapon na nangaon ang mga bata uban sa 17-anyos nga maguwang nga maoy nagluto niini. Apan paglabay og usa ka oras giingong nagsuka-suka na ang mga bata ug nagkalibanga.

Wala ang ginikanan sa mga bata dihang sila nangaon kay naglabada ang inahan nanglabada samtang ang amahan nagtrabaho.

Matud ni Luche, pagabot sa amahan nakugang kini nga nakabsan na sa kinabuhi ang 2-anyos niya nga anak samtang ang usa ka tuig uban sa singko, says, unom ka buwan nga masuso ug ang kwatro anyos nagmulo sa kasakit sa tiyan ug nagsige og suka-kalibang.

Dali silang gidala sa tambalanan apan nakabsan gyud sa kinabuhi ang usa ka tuig. Si Luche ug kapikas nga si Edna maoy mitabang sa galastohan sa mga nalandig sa tambalanan samtang si kanhi konsehal Malou Pepito nihatag og duha ka lungon alang sa pagpahiluna sa duha nga nakalas.

Si Mayor Sun Shimura mipadala sab og hinabang para sa pamilya. Kagahapong adlawa, gikatahong luwas na ang mga nalandig sa tambalanan apan kinahanglan pa og dugang pagatiman.

Ang mga kadagkuan sa panglawas sa lungsod nisusi karon sa hinungdan sa kamatayon sa mga bata.  Ang panimalay sa mga nangamatay nahimutang sa bukiran nga bahin sa Barangay tapilon.— /IBM (BANAT NEWS)