MCWD nameligrong mawagtangag 35m litros nga tubig

CEBU, Philippines — Nameligrong mawagtangan og dili mominus 35 milyones litros nga tubig ang Metropolitan Cebu Water District (MCWD) kada adlaw tungod sa nitumaw nga kakulian ang bulk water supply niini gikan sa sapa sa Luyang, Lungsod sa Carmen.

Si Gob. Gwendolyn Garcia nipataawag og dinaliang sesyon sa hunta probinsiyal kagahapon aron pagpasar og resolusyon nga magtugot kaniya sa paghimo og tukmang lakang nga mapanalipdan ang interes sa probinsiya may kalabutan sa joint venture agreement tali sa Manila Water Consortium (MWC).

Ang resolusyon gipangamhanan ni Bokal Glenn Anthony Soco kinsa nagkanayon nga wala nila giklaro kung unsa nga lakang ang angayang himoon sa gobernador.

 “As to what she will do, we cannot speculate as to the wisdom of the Governor as to what action she will take. We have full trust and confidence in the Governor that she will act on the best interest of the Province, and the Cebuanos,” matud ni Soco.   

Gikasubo sa MCWD ang maong balita apan ilang gipasalig nga mapugngan ang epekto ngadto sa serbisyo sa ilang mga konsumidor.

Niadtong 2012 gihulma sa Kapitolyo ug MWC ang Joint Investment Company (JICO) nga ginganlan og Cebu Manila Water Development (CMWD), Inc., aron pag-supply og treated bulk water sa MCWD gikan sa Luyang River.

Apan nakita sa Kapitolyo nga dili makiangayon ang ?24.59 per cubic meter nga presyo dihang ang MCWD nipalit og ?65.00 per cubic meter sa laing supplier gikan sa Lusaran, Cebu City.

Sa tigum nga gipatawag ni Garcia, gipasalig ni MCWD chairman Jose Daluz III ug general manager Edgar H. Donoso ang price adjustment sugod Enero 1, 2023 apan wala kini gituman.

Laing kalapasan sa CMWD mao ang giingong pag-supply niini og sobra pa sa 35 milyones litros nga tubig matag adlaw ngadto sa MCWD ug pag-abli niini og duha ka production wells sa lugar nga wala sa kontrata.  (BANATNEWS)