Pagmugna sa Interdiction Unit sa Sugbu gihangop

CEBU, Philippines — Makapakgang sa ipalusot nga illegal nga drugas diha sa seaports ug airport ang gipormang Interdiction Unit sa lalawigan sa Sugbu matod pa sa Philippine Drug Enforcement Agency(PDEA)-7.

Si Cebu Governor Gwendolyn Garcia nag-umol og One Cebu Inter-Agency Interdiction Task Force nga gilangkuban sa nagkadaiyang law enforcement agencies.

Ang PDEA-7 duna nay Inter-Agency Interdiction Unit nga gi-assign sa nga pantalan ug tugpahanan apan matod sa tigpamaba sa PDEA-7 Leia Alcantara nga pinaagi sa One Cebu Inter-Agency Interdiction Task Force mas molig-on pa gyud ang kampanya kontra ilegal nga drugas dinhi sa Sugbu.

“Sa pamaagi aning interdiction unit apil man ani ang LGUs so maka-tap ta nila, maka train ta og personnel sa LGUs, ilahang mga employed personnel matudloan nato kanang mga basic lang gud nga interdiction operation, kanang assessment, screening, mga ingona na ba unya mahulog sila nga sila’y force multipliers nato sa seaports daghan baya ta specifically seaport diri sa Cebu Province so kinahanglan gyud ta naay dedicated team nga makatutok gyud ani nila nga areas,” matud ni Alcantara.

Gihimug-atan ni Alcantara nga gikinahanglan gyud nga hingusgan ang interdiction effort sa mga pantalan ug tugpahanan apan dili nila kini mahimo kun kuwang og tawo.

Dako sab kini og tabang matud pa aron masustenihan ang kampanya batok sa illegal nga drugas.  Ang gihimo ni Garcia pahaom kini sa iyang deklarasyon og “all-out war against illegal drugs” sa tibuok lalawigan. (BANATNEWS)