Kagawad nga nadakpan tungod sa drugas gipa-Ombudsman

CEBU, Philippines — Tulo ka kasong administratiba ang gipasaka sa Philippine Drug Enforcement Agency (PDEA-7) batok sa Konsehal sa Barangay Mainit, siyudad sa Naga may kalabotan sa pagkaaresto kaniya sa ilegal nga drugas.

Ang gikasohan mao si Mainit Brgy. Kagawad Renante Chiong nga gidakop niadtong Agosto 23, 2022 tungod sa paghupot ug paggamit og illegal nga drugas.

Ang tigpamaba sa PDEA-7 Leia Alcantara dihang nahinabi kini sa mga tigbalita diin niadtong adlaw'ng Miyerkules miingon nga ni-file sila og kaso sa Office of the Ombudsman batok ni Chiong.

Ang mga kaso nga gipasaka mao ang kalapasan sa Republic Act 6713 kun Code of Conduct and Ethical Standards for Public officials and Employees; grave misconduct subay sa Section 50 Rule 10 sa 2017 Rules on Administrative Cases in Civil Service ug ang ikatulong administrative case mao ang Conduct prejudicial to the est interest of service pursuant to section 46 chapter 7 sa Revised Administrative Code of 1987 sa Civil Service Commission.

Gipasabot Alcantara nga dili trabaho PDEA-7 nga sila'y mangunay og pasaka’g administrative cases batok sa mga barangay officials nga ilang madakpan apan ilang tinguha nga epektibo gyud ang anti-illegal drug campaign sa rehiyon mao nga sila na ang nihimo og inisyatiba nga mopasaka sa kaso.

Gawas niini kay sila ang nakadakop ug sila sab ang nasayod sa panghitabo.

Gusto gyud PDEA nga manubag ang konsehal sa gibuhat niini tungod kay usa siya ka barangay official nga magsilbi untang ehemplo sa katawhan apan mao na hinuon ang nihimo og dautan.

Kun mapatud-an nga sad-an gyud ang konsehal dili na kini makahupot og bisan unsang posisyon sa gobyerno.

Kahinumduman ang konsehal gidakop diha sa panimalay niini sa Barangay Mainit pinaagi sa search warrant ug atol sa operasyon nakuhaan kini og 12 ka paketeng gituohang shabu ug duna say mga drug paraphernalia nga nga na-recover ug dihang gi drug test kini positive kini.— IBM (BANATNEWS)