Mga amahan makatabang kontra ilegal nga drugas

CEBU, Philippines — Ang Philippine Drug Enforcement Agency sa Central Visayas (PDEA-7) misuporta sa programa sa Department of Social Worker and Development (DSWD) nga nag-empower sa mga amahan kay kini dakong tabang sa ilang kampanya batok ilegal nga drugas sanglit daghang amahan ang biktima sab sa ilegal nga drugas.

Si Leia Alcantara, ang tigpamaba sa PDEA-7 miingon nga miyembro ang ilang buhatan sa Regional Interagency Committee on Filipino Families.

Kabahin sila sa programa sa DSWD-7 nga mao ang “Empowerment and Reaffirmation of Paternal Capabilities,” nagtumong sa paghatag og gahom sa tanang amahan sa komunidad.

Matud ni Alcantara nga tanan untang mga amahan mao ang mogiya sa pamilya apan naobserbahan sa DSWD nga dili na lig-on ang ubang mga amahan karon, adunay nawala sa hustong dalan samtang ang ubang amahan biktima sa ilegal nga drugas.

Gipaningkamotan sa DSWD, PDEA ug uban pang ahensiya ug grupo nga mabalik sa sakto nga dalan ang mga haligi sa panimalay aron magiyahan sa hustong dalan ilang mga anak.

Giisip sa PDEA-7 nga usa ka seryosong problema ang pagkalambigit sa mga bata sa ilegal nga drugas. Mas maprotektahan sila kun mamonitor ang mga kalihokan sa ilang mga ginikanan.

Sa laing bahin, nibutyag ang PDEA-7 nga adunay posibilidad nga ma-revoke ang mga drug cleared barangays kung ang barangay mismo nagpasagad na human sa maong status. Matud ni Alcantara nga kapin sa libo na ang drug cleared barangays ug adunay mga drug personalities nga nadakpan pero wala kini ma-revoke tungod kay ang mga reports naggikan mismo sa barangay.

Apan mipasidaan kini nga adunay posibilidad nga ma-revoke kini nga status kun mapamatud-an nga napasagad sila pagmentinar nga wala nay ilegal nga drugas nga naglihok sa ilang lugar.

Usa sa mga basehan nga pwede ma-revoke ang status sa usa ka barangay kung kini wala nagpahigayon og meeting, wala nay monitoring asa ilahang drug personalities ug kung wa na silay mga demand reduction activities.

Sa yearly validation sa PDEA-7 wala pay mga barangay nga na-revoke.

Sa kalambigit nga balita, nakadawat og P50, 000 nga cash incentive ang Barangay Caw-oy sa Isla sa Olango sa Siyudad sa Lapu-Lapu human sila nadeklarar nga drug cleared barangay sa Regional Oversight Committee nga gipangulohan sa PDEA-7.

Si Mayor Junard  Ahong Chan miingon nga gisaad na niya ang paghatag og cash incentive sa mga kalampusan sa tinguha niining pagsumpo sa ilegal nga drugas.

Sa laing bahin, usa ka barber ang nadakpan human gipasanginlang nangawat og baligya sa usa ka mall sa Barangay Tabunok, Dakbayan sa Talisay niadtong Lunes sa hapon aron ipalit og ilegal nga drugas.

Ang dinakpan mao si Jerome Llenes Abanay, 47, taga Pusok, Lapu-lapu City. Sumala pa nga nasakpan kini nga nangawat og upat ka shorts nga nikantidad og P4,396.

Ang gwardiya nisita kaniya ug gidakop kini human wa makapakita sa resibo sa iyang gibitbit nga mga baligya pagawas sa maong establisamento.

Sa pakisusi sa kapolisan, nasikop na sa Mandaue si Abanay ug kaduha sa siyudad sa Lapu-Lapu sa susama nga modus operandi.

Matud pa duha ka tuig niya kining gibuhat ug ang halin sa kinawat iyang ipalit og ilegal nga drugas. Matud niini sa kapolisan hinay ang kita sa pagpanupi. —Rowena Capistrano, Romeo Limpangog ug Letty G. Mariscal CNU Intern ug Mary Rose A. Carciller UV Intern/IBM (BANATNEWS)