Duha ka ex-convicts nakuhaag P6.9 milyones shabu

CEBU, Philippines — Moabot P6.9 milyones nga balor sa ginadili nga drugas ang nasakmit sa may Sitio Bato, Barangay Ermita sa Dakbayan sa Sugbo, Biyernes sa hapon. Ang nagpahigayon sa buy-bust operation mao ang City Drug Enforcement Unit sa Cebu City Police Office nga gipangulohan ni Police Major Dindo Alaras kauban ang hepe sa City Intelligence Unit nga si Police Lieutenant Colonel Allan Rosario.

Ang nasikop mao si Archie Diano Lañojan, 42, tig-assemble og computer, nagpuyo sa maong dapit, ug gikonsiderar nga high-value individual (HVI) listed, Priority 10 sa drug watchlist.

Giangkon ni Lañojan nga usa siya ka ex-convict, napriso siya pag 2016 sa kaso gihapon sa ilegal nga drugasug nakagawas niadtong 2019.

Dugang pa ni Lañojan nga kapin sa semana palang siyang nibalik sa illegal nga kalihokan og hatagan siya’g P10 mil matag hurot sa drugas nga gipabaligya kaniya.

Gibutyag ni Alaras nga sa Barangay Ermita nagagikan ang source sa suspek  apan wala kini motug-an kun kang kinsa kay giingong tawgan lang siya niini kun dunay ipabaligya. Nasakmit gikan ni Lañojan ang nagkadaiyang putos sa gidudahang shabu nga motimbang og 1,020 gramos ug mobalor dul-an P2.9 milyones. Sa laing operasyon, dul-an sa P2.9 milyones nga balor sa ginadili nga drugas ang nasakmit atol sa buy-bust operation diha sa Ma. Gochan St., Barangay Mambaling, Dakbayan sa Sugbo alas 10:30 sa gabii, Hulyo 28, 2022.

Ang buy-bust operation gipahigayon sa Station Drug Enforcement Unit (SDEU) sa Police Station 11 ug Cebu City Police Office (CCPO) nga miresulta sa pagkasikop ni Jesus Hermosora Belamia, 47, usa sav ka ex-convict ug gikonsiderar sa kapulisan nga regional level high value individual (HVI).

Siya napriso sa tuig 2017 ug nakagawas pag 2019 sa kaso gihapon sa ilegal nga drugas. Sama kang Lañojan, kini mibutyag nga bag-ohay palang siya nibalik sa illegal nga kalihokan ug ikaduha pang higayon nga gibinlan siya sa usa sab  ka bag-ong laya (priso kaniadto) og 200 gramos nga ginadiling drugas dayun hatagan siya og mil singko kung mahurot kini.

Nasakmit gikan sa dinakpan ang 21 ka pekete nga adunay 421 gramos nga gituohang shabu nga mobalor dul-an sa P2.9 milyones. —Letty G. Mariscal Mary Rose  A. Carciller /IBM (BANATNEWS)