16 ka tawo sikop sa buy-bust; Mga residente naukay sa chemical

CEBU, Philippines —  Duha ka drug den ang napuhag ug 15 ka tawo ang nasikop atol sa gipahigayong pagpangrond sa mga sakop sa Philippine Drug Enforcement Agency-7 kagahapon sa buntag diha sa managlaghing lugar sa Dakbayan sa Sugbo.

Tulo ka tawo ang nasikop atol sa pagpangronda sa PDEA-7 Regional Special Team kagahapon sa alas 5:45 sa buntag diha sa Barangay Quiot Pardo.

Ang nasikop mao si Alberto Cuadero, 55, giingong tigmentinar sa drug den ug subject sa operasyon ug duha ka bisita sa drug den nga sila si Marites Carbonel, 47 ug Leonardo Gadiane, 53.

Nasakmit gikan sa mga suspetsado ang siyam ka paketeng shabu nga nitimbang tanan nagdto sa 11 gramos ug nikantidad ngadto sa P74,800, buy- bust money ug drug paraphernalia.

Matud ni Leia Albiar Alcantara, tigpamaba sa PDEA-7 giingong makabaligya og 25 ngadto sa 30 gramos nga shabu matag semana si Cuadero.

Sa susamang adlaw sa alas 10:00 sa buntag laing drug den diha sa Barangay Tisa ang napuhag usab sa PDEA-7 RSET diin 12 ka tawo ang nasikop.

Nasikop si Arnel Pacaña, 49, usa ka aircon technician, giingong nagpadagan sa drug den ug subject sa operasyon.

Lakip sa nasikop ang mga bisita sa drug den nga sila si Joel Villejo, 39, habal-habal driver; Steven Monares, 24, habal-habal driver; Giovanni Intic, 45, drayber sa taxi; Nelson  Odchigue, 58, walay trabaho; Jefferson Cubillo, 26, habal-habal driver; Irenio Mendez, 26, habal-habal driver; Ricky Hortezano, 37, tindero; Alex Altamira, 54, dispatser; Rodulfo  Castillon, 39, construction worker; Rolando Quibilan, 57, habal-habal driver; ug Gil Silvosa, 40, habal-habal driver.

Nasakmit gikan sa mga suspetsado ang 19 ka paketeng shabu nga nitimbang ngadto sa 10 gramos nga mobalor ngadto sa P68,000, buy-bust money ug drug paraphernalia.

Sa laing bahin, nasikop ang usa ka 23-anyos nga lalaki atol sa buy-bust operation sa kapolisan sa Presinto 2 sa Mandaue City Police Office sa niaging gabii diha sa Barangay Subangdaku, Dakbayan sa Mandaue.

Si Police Major Romeo Caacoy Jr. hepe sa Presinto 2 niila sa suspetsado nga mao si Mark John Balid, residente sa lugar.

Nasakmit gikan sa suspetsado ang 13 ka gagmay’ng pakete nga shabu nga nikantidad ngadto sa P27, 000 ug buy-bust money.

Samtang sa Dakbayan sa Talisay, naukay ang mga residente sa Barangay Bulacao sa nahisgutang siyudad sa chemical nga gibiyaan diha sa apartment nga giabangan Gregorio Aceberos, hingkod ang panuigon ug giingong nagpaila nga sakop sa PDEA.

Ang tag-iya sa apartment nangayo kini og tabang sa opisyales sa barangay ug sa kapolisan tungod kay si Aceberos kinsa wala makabayad sa abang sulod sa pito ka buwan ang nibiya kini nga walay pananghid.

Giingong si Aceberos nagpaila ngadto sa ubang nangabang nga sakop sa PDEA hinungdan nga naintriga sila sa chemical nga naa sulod sa giukopahan nga apartment sa nauna.

Apan nasuta sa kapolisan ug opisyales sa barangay nga ang maong chemical color sand painting nga gamiton sa art sa mga bata ug nahibaw-an nga namaligya si Aceberos niini. — Letty G. Mariscal CNU Intern, ug Mary Rose A. Carciller UV Intern, Romeo T. Limpangog ug Gabriel C. Bonjoc, BDB (FREEMAN)