Kaso sa dengue padayong gibantayan

CEBU, Philippines — Gibutyag ni Dr. Jeffrey Ibones, Officer-in-Charge sa Cebu City Health Department nga misaka gihapon ang kaso sa dengue sa Cebu City apan ilang nakita nga pa ubos na ang trend niini.

Sa datos nga gihatag ni Dr. Ibones sa week 25 ang kaso sa dengue sa dakbayan niabot na og 1,337 ug sa buwan sa Mayo ang siyudad nakatala og 361 cases apan sa buwan sa Hunyo naa lang sa 250 ang kaso.

Apan giklaro ni Dr. Ibones nga padayon gihapon ang lakang nga ilang buhaton aron moubos pa ang kaso sa dengue ilabi na nga panahon na sa ting-uwan ug matod pa dunay umaabot nga bagyo sa buwan sa Hulyo base sa forecast sa PAGASA.

“Hopefully mo-down ni siya, pero mao lagi maningkamot lang ta, we are doing our best man gyud para mo-decrease ang atong cases”, sigon ni Dr. Ibones.

Una niini, ang Cebu City Government dunay giumol nga dengue task force nga pinangulohan ni Sonia Empinado ingon man task force sa mga Barangay aron makatabang sa pagbatok sa dengue.

Daku og papel ang mga opisyal sa barangay aron pag edukar sa katawhan uban sa mga kawani sa health centers.

Asoy pa ni Ibones sa alas 3 hangtud sa alas 5 sa hapon nila nga pagsuroy sa mga sitio sa kabarangayan giawhag gyud nila ang mga barangay officials nga mouban aron motabang og hangyo sa mga tawo nga manglimpyo.

Samtang padayon pa nga gi-verify sa Cebu City Health Department ang impormasyon nga nadugangan matod pa ang mortality sa Cebu City tungod kay naa man kini na-ospital sa dakbayan sa Mandaue.

kun ma-verify na nila mahimo na unyang 18 ang namatay sa dengue sa Cebu City gikan sa buwan sa Enero hangtud sa Hunyo ning tuiga. MEL (BANATNEWS)