Gubat kontra dengue ilusad

CEBU, Philippines — Gipaabot nga mopagawas og Executive Order alang sa pagdeklarar og gubat batok sakit nga dengue si Cebu City Mayor Michael Rama human nga naalarma na kini sa gidaghanon sa mga nakalas sa siyudad tungod sa maong sakit.

Sa datos sa Cebu City Health Department gikan sa buwan sa Enero hantod sa Hunyo 23 ning tuig 16 na ang nakalas sa Cebu City tungod sa dengue.

Sa mga nakalas dunay nag-edad pa lang og walo ka buwan, usa ka tuig , 2 anyos, 3 anyos, 4 anyos, 5 anyos, 6 anyos, 10 anyos, 20 anyos, 22 anyos, ug ang pinakataas og edad nga namatay tungod sa dengue, 60-anyos.

Gikan ni sila sa Barangay Quiot, Kalunasan, Bulacao, Mambaling, Suba, Buhisan, Mambaling, Kinasang-an, Guadalupe, Inayawan, Pardo, Labangon ug Tisa.

Ang top 10 Barangays nga daghan og kaso sa dengue base sa talaan ning bulana gilangkuban sa Guadaupe 115 ka kaso, Lahug 69 ka kaso, Tisa 60 ka kaso, Labangon 57 ka kaso, Pardo 52 ka kaso, Inayawan 47 ka kaso, Kamputhaw 43 ka kaso, Mambaling 42 cases, Talamban 40 cases, Punta Princes ug Quiot nga dunay 36 ka kaso sa dengue.

Gihulagway ni Rama nga dili na kinahanglan maghuwat nga dunay dengue outbreak nga mahitabo una mohimo og mga lakang aron mapugngan ang pagsaka sa kaso.

Ipatawag ni Rama ang tanang sektor nga aron tukion ang ang maong hulga sa publiko.

Mabasa unya sa EO ni Mayor Rama ang mahitungod sa bottoms up approach sa mga kabalayan, ang Liga ng mga Barangay manginglabot na sab sa pagtubag sa maong problema, hatagan og pagtagad ang search and destroy ug pahinumduman sab ang tanan ug mag-awhag nila samg angayan buhaton aron batukan ang maong makamatay nga sakit.

Samtang si Dr. Anton Oliver Reposar, Medical Director sa CCMC miasoy nga gipangandaman nila pagatiman sa mga pasyenteng dunay dengue.

Gikan Enero hangtud ning bulana (Hunyo 23,2022) ang Cebu City Health Department nakatala og 1,254 ka mga kaso sa dengue.— IBM (BANATNEWS)