Duha ka batang babayeng mangunguot nadakpan
CEBU, Philippines — Duha ka batang babaye nga gidudahang maoy responsable sa mga kaso sa pagpanguot sa Talisay City nadakpan niadtong Miyerkules sa kaadlawon.
Kini human ang kapulisan nihimo sa hot pursuit operation sa dihang dali nga nakasumbong ang biktima ug nailhan ang mga suspetsado pinaagi sa kuha sa CCTV footage.
Si Police Lt. Col. Randy Caballes, hepe sa kapulisan sa Talisay nagkanayon nga notado na gyud sa ilang modus ang duha ug gani nagsud gawas nalang kini sa prisohan.
Una niini, usa ka babaye ang naglakaw sa dalan nga gisundan sa duha ka mangunguot. Paspas ang mga kamot sa mga suspek ug nakuha gyud nila ang cellphone ug pitaka sa biktima.
Nisumbong dayon ang biktima sa otoridad hangtud nga natultolan ang mga suspetsado. Nakuha gikan sa mga dinakpan ang P6,000 nga salapi ug duha ka pitaka.
Sa pakisusi sa kapulisan, nag edad og 14 anyos ang duha apan ang usa niangkon nga nagpangidaron na sa 17 anyos. Giawhag ni Caballes ang uban pa nga nabiktima sa pagpanguot sa pagbisita sa ilang buhatan aron ilhon ang duha ka dinakpan kung kini ba sab ang nakapamiktima kanila ug aron sab modungag sa pagsang-at og kaso.— IBM (BANATNEWS)
- Latest
