MCWD mopasaka sa presyo sa ilang singil

CEBU, Philippines — Gikumpirmar sa  Metropolitan Cebu Water District (MCWD) nga naa na sila karon sa proseso sa pagpausbaw sa bayranan sa tubig.

Apan gipasalig sa maong water district nga kun pananglitan maaprobahan sa Local Water Authorities Administration (LWUA) ang maong tinguha, ilaha lang kini i-implementar kun maayo nga supply sa tubig.

Ang General Manager sa MCWD nga si  Stephen Yee nibutyag ngadto sa mga tigbalita nga molanat pa og taas nga panahon ang pag-proseso alang sa pagpausbaw sa bayranan sa tubig gumikan kay daghan pa kini og agian sama nalang sa mga public hearings.

Dugang pa niya , nga naghan-ay pa sila sa ubang mga dokumento alang sa maong katuyoan.

Pipila sa hearing kay  pagahimoon sa ilang mga hurisdikyon sa gialagaran nila nga local government units (LGUs)nga sama sa Cebu City , Mandaue City, Talisay City , Lungsod sa  Liloan ug uban pa.

Napanglantawan sa MCWD  nga sa   hinapos pa nga bahin karong tuiga makuha nila ang response sa LWUA ,busa kun duna man gani pag-usbaw sa bayranan, posibleng sunod tuig pa kini ma-implementar.

Nasayran nga katapusang nipausbaw ang MCWD sa bayranan sa tubig kay niadtong pang 2015.

Ang planong usbaw sa bayranan sa tubig moabot  og 60% nga pinasubay usab sa bracket sa mga konsumidor.  Hinuon ang partikular nga figure sa usbaw kay nagdepende sa mahimong dagan sa public hearing base sa pagsusi usab sa LWUA.

Matud pa ni Engineer John Macabinta, corporate planning department head sa  MCWD dili nila ipatuman ang usbaw kun walay improvement sa supply sa tubig.

“Kinahanglan gyud nga ma-feel sa mga tawo ang nindot nga supply sa tubig. Kun ma -feel na nila , diha pa ta mopa-increase, “ matud pa ni Macabinta.

Gipaabot nga mas mapalapdan og samot sa MCWD ang maayong  distribusyon sa tubig  ilabi na nga nagkaduol na ang kahumanan sa Lusaran Bulk Water Project nga maka-supply og 15,000 cubic meters matag adlaw.   Gibana-bana nga maka-operate na kini karong Setyembre. (BANAT NEWS)