Lima kasohan tungod sa sunog

CEBU, Philippines — Dili momenus sa lima ka tawo ang posibleng  pasakaan og kasong arson sa Cebu City Fire Office human matod pa sila maoy gitumbok sa mga residente nga responsable sa nahitabong sunog sa Barangay Punta Princesa, siyudad sa Sugbo.

Matod ni Senior Fire Officer 2 Wendel Villanueva naestablisar nila nga tinuyo ang pagsunog sa lugar nga nikatap sa lima ka sitio sa Tuburan, Trinidad, Arca, Enriquez ug Little Bamboo.

Duna sila karoy lima ka persons of interest diin usa na niini mao si Marilou Alfeche alyas “Marimar” basi kini sa tanang nahipos nilang mga testimonya sa mga silingan sa maong mga gidudahan.

“Katong naay personal knowledge maong among gi welcome ang mga tawo nga mobisita unta sa atoang buhatan para to shed light sa maong sunog nga nahitabo,” matud ni Villanueva.

Tinguha sa Cebu City Fire Office nga mahatagan og hustisya ang liboan ka mga tawo nga naapektuhan sa sunog nga mikalas sab og usa ka tawo.  Duha ka anggulo ang gitan-aw sa kabomberohan nganong nahitabo ang sunog una mao nga dunay nahitabong away sa pamilya nga miresulta sa dakong sunog; ikaduhang anggulo posibleng dunay gustong taguan sa panimalay nga subject sa police operation hinoon ang maong mga impormasyon nga ilang nakuha beripikahon pa.

Nasayran nga si Alfeche midangop sa buhatan sa kapolisan aron limpyohan ang pangalan niini human usa siya sa gipasanginlang hinungdan sa sunog.

Iyang gitumbok ang pamilya sa iyang kapuyo nga nanghulgang sunogon iyang balay kung dili kini mopahawa sayo nianang adlawa tungod kay siya ang gidudahang nagpadakop sa kapuyo nga nalambigit sa ilegal nga drugas.

Sa uwahing datos sa Department of Social and Welfare and Services moabot sa 711 ka balay nga gipuy-an sa  892 ka pamilya nga gilangkuban og 3,663 ka indibidwal ang nalista nga apektado sa sunog.

Sigon ni Regeline Abaño sa DSWS nga mosaka pa ang ihap sa mga naapektuhan sa sunog tungod kay nagpadayon ang ilahang pagpangalista ug balidasyon.

Gipahibawo ni Atty. Gerry Carillo, Cebu City Disaster Risk Reducation and Management Council Chairman ang Barangay Punta Princesa mideklarar na og state of calamity.

Ang mga nasunogan naa karon gipahiluna sa Punta Princesa Elementary Shcool, Mambaling ug Atillo gym ug giatiman sa mga sakop sa Cebu City Health Department tungod naa pay pandemic ug naa sab ang dengue.

Ang maong sunog sa Barangay Punta Princesa nagbilin og danyos nga P16.5 milyones.

Samtang ang Principal sa Punta Princesa Elementary School Donald Crisologo miingon nga ang limited face-to-face classes sa mga tinun-an gikan sa Kinder hangtod sa Grade 6 magpadayon ra.

“For us sa elementary second batch na nato kay we started our limited face-to-face in the elementary level ato pang Mayo 30, nahuman ang two week ang 10 days atong Biyernes, June 10,” sigon ni Crisologo.

Hangyo sab ni Crisologo sa kagamhanan sa siyudad sa Sugbo nga mapabilin ang kalimpyo sa mga tunghaan ug mamentinar ang kahapsay ug kalinaw sa lugar.– Rowena Capistrano/IBM (BANATNEWS)