Mga eskwelahan nga mag-F2F hugtan ang siguridad

CEBU, Philippines — Gipaniguro sa kagamhanan sa Siyudad sa Sugbo ang seguridad sa mga tinun-an  alang sa pagsugod sa implementasyon sa limited face to face (F2F)  classes.

Nasayran nga pipila ka mga eskwelahan sa urban barangay ang magsugod na sa pisikal nga klase sugod karong adlawa.

Matud ni Konsehal Phillip Zafra chairperson sa committee on peace and order sa konseho sa siyudad nga adunay igong pwersa ang kagamhanan uban sa koordinasyon sa kapolisan alang sa pagbutang og mga tawo palibot sa eskwelahan aron mamentinar ang kahapsay ug kalinaw.

“Mo-roving sad ko sa mga eskwelahan, ato gyud nga siguradoon ang malinawong pagbalik sa face to face classes”, matud ni Zafra.

Samtang ang Cebu City Transportation Office (CCTO) mo-deploy usab sa ilang mga personnel duol sa mga eskwelahan sugod karong adlawa.

Lakip sa lapad nila nga pagbantay sa trapiko mao ang mga oras nga kasagaran dagsaan sa mga tawo.

Gawas sa limited face to face classes gikatahong adunay ubang mga area nga magpadayon gihapon ang modular, offline ug online mode nga klase.

Hugot usab nga ipatuman ang health protocols ilabi na nga nagpabilin gihapon ang hulga sa COVID-19. Sayo pa, gibutyag ni Konsehal Joel Garganera, hepe sa Cebu City Emergency Operations Center nga anaay template nga gi-set sa Department of Education, Department of Health ug local government unit alang niini.

Ang matag eskwelahan adunay gitagana nga isolation center alang sa mga tinun-an nga nagpakita og sintomas sa COVID-19.  BDB (BANATNEWS)