CCPO nihangop sa saad ni Rama

CEBU, Philippines — Gikalipay sa Cebu City Police Office(CCPO) ang suporta unya nga ihatag sa kagamhanan sa siyudad sa Sugbo human si Mayor Michael Rama nagtinguhang maangkon sa CCPO ang ‘Finest Philippine National Police’ sa tibuok nasud.

Si Police Lt. Col. Maria Theresa Macatangay, tigpamaba sa CCPO nagkanayon nga ang kapulisan sa siyudad sa Sugbo miingon nga daghang mga proyekto ang gipaabot nga makapalambo sa kapolisan. Pipila sa mga proyekto nga posibleng buhaton mao ang pag-establisar og duha ka bag-ong police stations diha sa Barangay Malubog ug Adlaon.

Lain nga ilahang gihisgutan mao ang pagpamubo sa proseso pagtubag sa isyu may labot sa mga batang nakalapas sa balaod, mga libud-suroy ug mga batang biktima sa pangabuso.

“Gitutukan nato na because parte sa atoang paglambo as usa ka siyudad is ang pag-ensure nga nindot ang atoang peace and order diri sa siyudad and dako kaayo namong kalipay gyud nga ang suporta anaa namo and we look forward to realizing that dream with our Mayor Mike Rama,” sigon ni Macatangay. Tutukan sab sa administrasyon ni Rama ang problema sa mga public Closed Circuit Television(CCTV) sa dakbayan sa Sugbo nga daghan na ang nipalyar human sa bagyong Odette.

Giisip sa kapolisan nga dako kaayo og matabang sa pagsulbad ug pagpakgang sa mga krimen ang CCTV sa kadalanan. —IBM (BANATNEWS)