Barangay konsehal gipatay   

CEBU, Philippines — Patay ang barangay konsehal sa Brgy. Tungasan sa Olango Island, Lapu-lapu City human kini gipusil sa wala mailhing mamumuno niadtong Domingo sa gabii.

Ang biktima giila nga si barangay kagawad Jose Cabucos Quiros alyas Sadam, 30, residente sa maong lugar. Giingong supporter kini ni Kong. Paz Radaza kinsa nidagan karon pagka-mayor sa dakbayan.

Ang kapulisan sa Police Station 1 sa Dakbayan nakadawat og tawag gikan kang Brgy. Captain Triponia Abayan may kalabutan sa insidente diha Food Park sa maong lugar.

Si Quioros gipusil sa wala mailhing mga mamumuno samtang duna kini kaestorya atol sa pagpahimutang nila sa mga tents nga gamiton para sa piniliay.

Anggulo sa personal grudge ang gitan-aw nilang motibo sa pagkakaron.

“By that certain parameter we cannot yet tag this as election-related, although in the progress of this investigation, this could be acquire also,” matud ni Deputy Chief Investigator sa PRO-7, Police Lt. Colonel Leoncio Baliguat Jr.

Ang information officer sa LLCPO miingon nga si Police Major Judith Besa niingon nga duna silay nadawat nga impormasyon nga adunay nakasumpaki ang konsehal tungod sa pag-install niini og tent sa polling center.

Ang biktima dali nga gidala sa tambalanan sa Santa Rosa Community Hospital apan gideklarar kini nga dead on arrival. Duna kini upat ka igo sa bala sa nagkadaiyang bahin sa lawas. Ang kapolisan mibutyag nga tulo ka mga tawo ang nagbuhat sa krimen.

Ang Police Regional Office (PRO)-7 pinaagi sa ilang monitoring sa Regional Election Monitoring and Action Center (REMAC) miingon nga malinawon ang eleksiyon bisan pa man nakadawat og mga taho sa insidente sa pagpamusil sa Lapu-Lapu City, ug sa lungsod sa Fernando.

“May mga incident lang pero walang related sa election-incidents,” matud ni Police Brigadier General Roque Eduardo Vega, hepe sa PRO-7.

Sa San Fernando, gikonsiderar nga usa kini ka isolated case matud pang Baliguat tungod kay wala’y nakit-ang suspek o biktima kay giabandonar lang nga duha ka SUV nga dunay mga igo sa bala ang ilang naabtan sa Panadtaran niadtong Domingo sa tungang gabii.

Si Cebu Police Provincial Office (CCPO) Chief, Police Colonel Engelbert Soriano miingon nga tungod niini dili nila kini dayon tuohang election related shootings.— Rowena Capistrano, Romeo Limpangog/IBM (BANATNEWS)