“Tugbong Tabo” sa dakbayan gisalmotan sa kapin 50 ka mag-uuma

CEBU, Philippines — Kapin sa  50 ka mga mag-uuma gikan sa mga bukirang barangay sa Dakbayan sa Sugbo  ang nihatag og partisipasyon sa dugang hugna sa  “Tugbong Tabo”.

Ang pagpamaligya sa mga produkto sa mag-uuma giplastada diha sa Plaza Sugbo atubangan sa City Hall.

“Nag-abot dinhi ang barato, de-kalidad, ug presko nga mga produkto sama sa utanon, prutas, ug mga tanom gikan sa bukirang mga barangay sa dakbayan sa Sugbo,” segun pa sa report sa Cebu City Public Information Office. Duna pu’y pipila ka mga taga siyudad ang nipakita usab sa ilang talagsaon nga mga produkto sama sa bag, coin purse, bakus, ug uban pa.

Aduna usay namaligya og presko nga mga buwak, herbal, ug uban pa.

Nag-apod apod usab ang Cebu City Agriculture Department og libreng mga tanom nga ornamental.

Nasayran nga gisaulog sa Kagamhanan sa Siyudad sa Sugbo ang Farmers’ and Fisherfolk’s Month.

Sa paglusad niini gitataw sa kagamhanan nga ipatigbabaw gyud kanunay ang paghatag og importansya sa mga mag-uuma ug mangingisda.

Ang Farmers’ and Fisherfolk’s Month unang gisaulog niadtong Mayo 1989 pinaagi sa Presidential Proclamation No.33 diin ang batakang katuyoan mao ang paghatag og pasidungog ug pag-ila sa mga mag-uuma ug mangigisda nga naghatag og dakong tampo sa sektor sa agrikultura. MEL (BANATNEWS)