Mga nabiktima sa sunog sa brgy Tipolo duna nay kapuy-an
CEBU, Philippines — Hayan makabaton na og ilang kapuy-an nga panimalay ang mga biktima sa sunog sa Sitio Maharlika, Barangay Tipolo Siyudad sa Mandaue.
Kini nunot usab sa gipahigayon nga ground breaking ceremony sa tukoron nga housing project sa kagamhanan nga gipangulohan ni Mayor Jonas Cortes kuyog usab niya ang uban pa nga mga opisyal.
Ang nahisgutang proyekto tukoron ang lima ka idepisyo nga mahimong kapuy-an sa 530 ka pamilya.
Si Architect Marlo Ocleasa nga maoy head sa city planning department office sa siyudad sa Mandaue miingon nga mokabat sa P160 milyones ang gahin alang sa unang hugna sa proyekto.
Ang maugmad nga unang hugna gilauman nga mahuman niining tuiga ug mahimo na nga kapuy- an sa 80 ka pamilya.
Dugang pa ni Ocleasa kompleto sa mga panginahanglan ang magpuyo nga pamilya sama sa tubig, sugang dagitab ug uban pa. Si Mayor Cortes sa iyang pamahayag miingon iyang gipaniguro ang pagkompleto sa maong proyekto alang sa mga nabiktima sa sunog. MEL (BANATNEWS)
- Latest