Konseho sa Cebu City nagbangutan sa pagtaliwan ni Coach Yayoy
CEBU, Philippines — Nagbangutan ang Konseho sa Dakbayan sa Sugbu nunot sa pagpanaw sa usa sa mga beterano nga si Cebu City Councilor Raul “Yayoy” D. Alcoseba niadtong adlaw nga Sabado.
Ang iyang anak nga si Ramon Alcoseba nipahibalo niini pinaagi sa iyang Facebook post kagahapon sa buntag.
“In loving memory of Councilor Yayoy Alcoseba, please include him and our family in your prayers,” tipik sa iyang post.
Wala hinuon gihisgotan ang rason sa gikamatyan sa konsehal. Nailhan siya sa kadaghanan isip “Coach Yayoy” tungod kay aktibo kini kaayo sa basketball dinhi sa dakbayan.
Natawo siya sa Quezon City, Manila, niadtong 1951. Ang iyang kapikas sa kinabuhi mao si Ramona Ligia Miguel Santos Ynigo, ug duna sila’y upat ka mga anak nga sila si Janina Tesse , Samantha Rei Alcose , Ramonito ug Rafael.
Nahimo siya nga konsehal sa siyudad niadtong 2004 ug ubos siya sa partido nga Bando Osmeña Pundok Kauswagan nga gipangulohan ni kanhi mayor Tomas Osmeña.
Nahimo siya nga miyembro sa 10th, 11th, ug 12th Sangguniang Panlungsod sa Siyudad sa Sugbo , ug nahimo siya nga Board Member sa first district sa Sangguniang Panlalawigan Cebu Province gikan niadtong 2013 hangtod sa 2016.
Subli siya nga napili isip Cebu City Councilor niadtong 2019 isip sakop sa 15th Sangguniang Panlungsod. Sa mensahe sa SP Secretariat, naka-umol si Alcoseba og 34 ka mga ordinansa.
“Throughout his career, he sponsored 34 ordinances for the city. Fare thee well, Sir Yayoy. You will be missed,” tipik sa mensahe sa SP sa dakbayan.
Samtang ang mga kaubanan niya sa konseho kay nagbangotan usab sa pagpanaw sa konsehal .
Matud pa ni Konsehal Alvin Dizon nga nailhan si Alcoseba gumikan sa dedikasyon niini sa pagpangalagad.
“My dear colleague and seat mate in the 15th Sangguniang Panlungsod, Councilor Raul “Yayoy” Alcoseba, may have gone but his legacy of genuine and dedicated public service remains. Rest in peace, Kons and Coach Yayoy,” matud pa ni Dizon.
Sugod niadtong 2019 pipila na ka opisyales sa siyudad ang nipanaw , kini mao sila si Konsehal Antonio Cuenco, Kongresista Raul del Mar ug Mayor Edgardo Labella. —IBM (BANATNEWS)
- Latest
