3 ka truck sa basura nahipos sa Leni-Kiko rally

CEBU, Philippines — Tulo ka dump truck sa basura ang nahipos human sa gipahigayon nga Leni-Kiko grand rally diha sa North Reclamation area niadtong Abril 21, 2022. Suma pa ni Engineer Marivic Cabigas, pangulo sa Department of General Services (DGS,) sa dakbayan sa Mandaue nga kuwarenta ka personnel sa ilang buhatan maoy nanglimpiyo sa gawas nga bahin sa venue.

Kini human boluntaryo nga gilimpyohan sa mga supporters sa Leni-Kiko rally ang sulod nga bahin human sa event.

Gipasabot usab ni Ricky Ballesteros, lead organizer sa nahisgutang rally nga ang mga volunteers nanglimpyo sa mga sagbot pagka human sa kalihukan apan wa kini matiwas tungod sa kadaku sa area og naabtan na sila og gabii na kaayo.

Lakip sa mitabang sa pagpanglimpyo mao ang mga pribadong tawo uban sa mga kawani sa gobyerno. Nitabang usab ang mga members sa Youth Volunteers for Leni ug gitabangan usab sa mga volunteer nga gipadala gikan sa University of Cebu. Romeo T. Limpangog/MEL

Bag-ong hepe sa kabomberohan

usa ka abogado

Usa ka abogado ang bag-ong hepe sa kabomberohan sa Dakbayan sa Talisay nga magsugod sa paglingkod ugmang adlawa (Abril 25).

Kini human si Chief Insp. Arnel Abella nakaserbisyo na sa Talisay sud sa duha ka tuig.

Si Abella maoy magsilbing acting city fire director sa Mandaue City Fire Office.

Samtang ang mohulip kaniya sa Talisay mao si Atty. Sr. Insp. Alvin Torion nga gikan sa lungsod sa Consolacion.

Si Torion di na bag-o sa Talisay tungod kay nadestino siya sa maong siyudad sa dihang ubos pa ang ranggo niini.

Nahimo na siyang abogado og opisyal sa kabomberohan.

Samtang karon mobalik na siya sa Talisay isip hepe na sa iyang mga kanhi kauban.

Nagkanayon si Torion nga iyang ipadayon ang mga nasugdan sa iyang gisundan ug maningkamot nga mas mopalambo pa ang serbisyo sa kabomberohan.

Base sa nigawas nga kamanduan sa ilang labaw nga buhatan magsugod na sila sa pagtambong sa bag-o nila nga assignment karong adlaw nga Lunes. MEL (BANATNEWS)