Rama gisaway kay dili patas
CEBU, Philippines — Miani og mga pagsaway gikan sa katawhan ilabi na sa mga netizens si Cebu City Mayor Michael tungod sa matud pa dili patas nga pagtagad niini mga nasudnong kandidato nga buot mag-rally dinhi sa siyudad.
Kini human nga dunay mga alegasyon nga gihigpitan sa siyudad ang mga kalihokan sa mga kaatbang sa Uniteam nga maoy gisuportahan sa partido karon sa mayor nga makapahigayon sa ilang rallies sa dakbayan.
Partikular nga gisaway ang matud pa wala pagtugot sa mayor nga makapahigayon og rally ang grupo ni Vice President Leni Robredo diha sa Plaza Independencia niadtong Abril 9,2022.
Ang maong kalihokan mao ang gitawag nga PinkHimamat2022. Ang mga supporters ni Robredo magmartsa unta padung sa Plaza Independencia ug didto kini tapuson.
Apan tungod wala tugoti sa mayor, napugos ang grupo pagusab sa ilang rota ug adto nalang sila nipadulong sa SWU-PHINMA sa barangay Sambag Uno.
Apan niadtong adlaw nga Lunes, gitugotan sa siyudad ang mga supporters sa Uniteam nga anha manukad sa maong plaza ang ilang Unity Walk padung sa South Road Properties alang sa Uniteam Festival Rally.
Si Rama sa iyang bahin mipasabot nga iyaha lang gilikayan nga maghuot ang mga tawo sa maong plaza kun dunay mga political rallies nga pagahimuon.
Matud pa ni Rama nga kun mahimo, adto lang kini buhaton sa South Road Properties ug sa ubang lagpad nga lugar sa siyudad .
Pangangkon pa sa mayor, naleksyon siya sa nahitabong Arat Concert sayo ning buwana nga gipahigayon diha sa Cebu City Sports Center nga naghuot ang mga tawo.
Sumala pa niya nga kun maghisgot og political rally, adunay kandidato nga motungtong sa entablado.
Apan kun ang kalihokan parada o martsa sa mga adbokasiya wala ra siyay problema niini basta wala lang gyuy politiko. Gihulagway niyang “miscommunication” ra ang nahitabo sa dihang wala niya tugoti ang mga supporter sa usa ka partido nga buot mogamit sa Plaza Independencia.
Pipila ka netizens ang nisaway kang Rama ug gipasanginlang kini dili patas kay gitugtan sa siyudad sa Unity Walk ang pagamit sa pipila ka dalan nga wala gitugot kaniadto sa PinkHimamat. —/IBM (BANAT NEWS)
- Latest
