Kabalayan nabanlas, 18 nakalas sa Eastern Visayas

CEBU, Philippines — Daghang mga kinabuhi ang nakalas ug natabunan ang mga kabalayan tungod sa flashfloods ug pagdahili sa yuta sa Eastern Visayas dala sa bagyong Agaton sumala pa sa report sa lokal nga kagamhanan didto.

Matud pa sa Baybay City Disaster Risk Reduction and Management Office, 18 ka mga tawo na ang nakalas tungod sa bagyong Agaton didto sa maong lugar.

Si Jerico Guevarra, radio dispatcher sa Baybay City DRRMO mibutyag nganagpadayon pa hangtud ning pagsuwat sa balita ang search and rescue operations.

Matud pa napulo ka mga barangay nga grabeng naapektahan sa bagyo tungod sa landslide.

Si Gueverra midugang nga sa inisyal nila nga ihap, adunay 14 ka mga tawo ang  gidala sa tambalanan tungod sa landslide.

Sa video nga video nga gi-post sa usa ka Elwin V. Ocañada nga matud pa gikuha niini sa tambalanan sa Baybay City makita ang mga bata, senior citizens nga giingong molupyo sa Brgy. Cantagos nga na-rescue.

Giputos sila og insulators tungod sa katugnaw samtang nagpaabot nga atimanon sa mga doktor.  Ang mga rescue teams padayong nangita sa uban pang mga molupyo nga naapektahan sa landslide.

Ang mga barangay nga gitutukan nila kay naglangkob sa Mailhe, Cantagos, Bunga, Maypatag, Imelda ug Makinhas.

Wala pa hinuoy opisyal nga impormasyong gipagawas ang National Disaster Risk Reduction Management Council bahin sa Baybay City atong ning pagsuwat sa balita apan duna kini gikompirmar nga tulo nga nakalas apan wala pa sab matino kun sa Mindanao ba kini o sa Baybay City.

 Ang bagyong Agaton mao ang unang bagyong nisulod sa Pilipinas karong tuiga ug matud pa sa Pagasa nitugpa kini sa Basey, Samar kagahapon sa hapon adlaw nga Lunes. Apan ang unang landfall niini niadto pang Domingo sa buntag didto sa Eastern Samar.

Nagdala kini og maximum sustained winds nga 45 kilometros kada oras duol sa sentro ug haguros nga 60 kph. Sumala pa sa Pagasa, ang Agaton susama og wala moirog kagahapon.

Ubos karon sa Tropical Cyclone Wind Signal No. 1 ang: habagatang bahin sa Masbate (Dimasalang, Palanas, Cataingan, Pio V. Corpuz, Esperanza, Placer, Cawayan); Eastern Samar, Samar, Northern Samar, Biliran, Leyte, Southern Leyte, amihanang bahin sa Sugbu (Daanbantayan, San Remigio, Medellin, City of Bogo, Tabogon, Borbon, Sogod, Catmon, Carmen, Danao City, Compostela, Liloan) apil na ang Camotes Island, silangang bahin sa Bohol (Getafe, Talibon, Bien Unido, Trinidad, Ubay, San Miguel, Pres. Carlos P. Garcia, Mabini), Surigao del Norte, ug Dinagat Islands.

Gibantayan sab sa Pagasa ang gihulagway nga mas kusog nga bagyong dunay international name nga Malakas.

Gipaabot sab kining mosulod sa Philippine Area of Responsibility kagabii o ba kaha karong sayo sa buntag adlaw nga Martes, kun makasulod na kini dinhi tawgon kining bagyong Basyang.

Ang bagyong Agaton gipaabot nga naa karon sa Basey, Samar ug Marabut, Samar unyang hapon samtang ugma sa buntag naa na kini sa Guiuan, Eastern Samar ug 240 km silangang bahin sa Guiuan, Eastern Samar ini og hapon. —IBM (BANATNEWS)