Ikalimang suspek nga polis gikasohan
CEBU, Philippines — Ang Cebu Police Provincial Office (CPPO) mipasaka na og kaso sa ikaupat nga polis nga maoy ikalimang suspek nga nalambigit sa pagpatay sa magtiayong Baringui-an sa lungsod sa San Fernando.
Si Police Colonel Engelbert Soriano, CPPO Provincial Director nagkanayon nga ang nadugang sa gikasohan og robbery with double homicide mao si Police Staff Sergeant Alvin Enad, desk officer sa Ronda Police Station kinsa gikonsiderar nga “at-large” ug “camp restricted.”
Niadtong Miyerkules, Pebrero 23, 2022 una nang gipasakaag kasong robbery with double homicide ang tulo ka polis ug kanhi pulis nga kauban ni Enad sa matud pa pagpusil-patay sa barangay kagawad nga si Ma. Louela Baringui-an ug bana nga si Pedro, sa San Fernando, Cebu niadtong Pebrero 13, 2022.
Giila sa Police Regional Office (PRO)-7 ang upat mao sila si Staff Sergeants Rene Abella Catamora sa Consolacion Police, Junrey Ypil sa Danao City Police, Junrey Batobalonos sa Lapu-Lapu City Police; ug gitaktak ang pulis nga si Esmeraldo Quillosa.
Nasayran usab sa imbestigasyon nga si Quillosa gitaktak sa serbisyo kaniadto tungod sa kaso sa ilegal nga drugas dihang nadestino pa kini sa Consolacion Police Station.
Si Catamora kinsa napusilan sa tuong pulso atol sa ilang pag-ikyas sa iyang extra-judicial confession kini mibutyag sa pangalan ni Enad nga apil sa maong krimen.
Si Soriano miingon nga bisan gipasakaan na og kaso ang lima dili mohunong ang imbestigasyon sanglit ilang gitan-aw ang anggulo nga dunay kalambigitan sa politika ang maong insidente.
“We are still looking at the possibility of some other factors like political connection, political motives and other motives behind the killings,” dugang pa ni Soriano.
Sa pagkakaron nakig-alayon na ang CPPO sa Regional IAS alang sa pagpasaka sab og kasong administratiba batok sa upat ka aktibong polis. —IBM (BANATNEWS)
- Latest
