22 mil bakuna para sa mga bata gitagana para sa Sugbu
CEBU, Philippines — Dili mominos sa 22 mil ka mga reformulated Pfizer BioNtech vaccines ang gitagana sa Sugbo alang sa mga batang edad 5-anyos ngadto sa 11-anyos nga magsugod karong adlawa.
Gipahibalo ni Dr. Mary Jean Loreche, ang Chief Pathologist sa Department of Health ug kasamtangang tigpamaba sa Visayas Vaccination Operation.
Ang 22 mil ka mga bakuna bahin-bahinon sa nagkadaiyang local government units.
Ang Cebu City gitaganahan og 6,000 doses; Mandaue-3,000; Lapu-Lapu City-3,000; Talisay City-2,800; Naga City-1,500; Minglanilla-1,500; Consolacion-1,600; Cordova-1,000; Liloan-1,500 ug PBB-100.
Samtang projected population sa mga mabakunahan edad 5 ngadto sa 11 anyos kay Cebu City-6,863; Mandaue-15,758; Lapu-Lapu City-63,173; Talisay City-15,000; Naga-13,900; Minglanilla-20,454; Consolacion-14,633; Cordova-10,483; ug Liloan-14,580.
Dugang pa ni Loreche, karong adlawa Lunes adunay mga Local Government Unit nga mosugod na sa Ilang pagpamakuna alang sa mga Bata.
Samtang si Dr. Rey Cesar Bautista sa City Health Office sa Dakbayan sa Talisay nagkanayon nga diha sa Talisay City College (TCC) nila pagahimuon ang bakuna sa mga bata. Siya nitataw nga di nila itipon ang mga bata sa mga hamtong nga vaccination site aron malikayan ang kalibog kung unsa nga bakuna ang madapat sa mga bata.
Matud pa ni Bautista nga mas isog nga bakuna ang para sa mga hamtong apan ang bakuna sa mga bata makaprotektar sab nila sa virus nga dili grabe ang pamation.— Gabriel Bonjoc/IBM (BANATNEWS)
- Latest