Ayuda sa probinsiya sa mga biktima sa bagyo gipanghatag na

CEBU, Philippines — Gikan sa P5,000, giusbawan sa Probinsya sa Sugbo ngadto sa P8, 000 ang kantidad sa mga coupon cards nga mamahimong ma redeem sa mga Sugboanon aron makakuha sa mga construction materials alang pagpaayo sa mga balay nga hingpit nga naguba sa bagyong Odette.

Suma pa ni Governor Gwen Garcia atol sa iyang press conference nga inay P5 mil gihimo niyang P8 mil ang balor sa matag card. Kini mahimong ma redeem ngadto sa LGUs o sa mga partner nga merchants sa Probinsiya.

Makapahimulos niini mao ang mga beneficiary nga hingpit nga naguba ang ilang mga panimay sa bagyo.

Apil sa makuha sa mga Sugboanon apan libre ra hinoon mao ang mga COVID-19 kits nga gilangkoban kini og vitamins, lagundi, paracetamol ug uban pa.

Kagahapong adlawa Enero 19, 2022, gisugdan na nila ang pag-apod-apod sa maong coupon cards ngadto sa mga lungsod ug dakbayan sa Southern Cebu nga maoy labing nakaangkon og kadaot sa bagyo. Karong adlawa adto na usab sa 3rd district mang-apod-apod sa coupon samtang unya sa Sabado adto sa Northern towns

Samtag mokabat na sa 555 ka pamilya sa Argao ang nakadawat og housing materials alang mga nangaguba nga panimay tungod sa bagyong Odette.

Ang maong hinabang naggikan sa Non-Government Organization (NGO). Ang grupo sa Cebu Contractors Association, Incorporated (CCAI), Rotary Club of Cebu ug Shelter Box nagkahiusa ug nipili sa mga Argawanon nga nagkalisod.

Ang grupo nanghatag sab og 551 ka solar light ug 551 ka SBOP bag nga maoy gisudlan sa mga nagkalainlaing tools ug ubang consumables.

Si mayor Alan Sesaldo sa Argao nagpasalamat sa tulo ka organisasyon nga nipili sa ilang lungsod nga maoy hatagan sa ayuda. Gipasalamatan sab ang Philippine Army nga niabag sa kalihukan. —Gabriel C. Bonjoc/MEL (BANATNEWS)