Nag-ampo nga magpabilin sa alert level 2

CEBU, Philippines — Tungod aning paspas na sab nga pagsaka sa gidaghanon sa mga kaso sa coronavirus disease dinhi sa Sugbu bugtong pag-ampo sa mga health officials nga magpabilin gihapon sa classification alert level 2 ang Sugbu.

Kini human nga sa labing uwahing natala, nibalik na sab sa kapin usa ka libo ang aktibong kaso Covid-19 karon dinhi sa Sugbu base sa natala Enero 10, 2022 sumala pa sa DOH-7.

Apan bisan sa pagsaka niini, ang DOH tracker nagpakita nga ubos gihapon kaayo ang occupancy level sa mga pribado ug pangpublikong tambalanan kay naa lang kini sa 19.2 percent.

“We pray that one Cebu remains in alert level 2 and that our processes and containment measures can ride this surge,” matud pa ni Dr. Mary Jean Loreche, ang chief pathologist sa DOH-7. Usa sa mga nakitang rason nganong bisan sa pagsaka sa mga kaso gamay ra kaayo ang nalandig sa tambalanan, kini tungod kay ang mild lang ang sintomas ug di kinahanglang dad-on sa tambalanan ug anha nalang sa balay nagpaayo.

Napokus sab ang hunahuna sa tanan sa pagbangon gikan sa bagyo ug wala na kaayo sa hunahuna ang magpakonsulta sa mga doktor.

Mitaas sab ilang pagsalig nga naka-develop na og immune system kay bakunado na ug dunay uban nga nakapa booster na maong dili na sila magpa-hospital.

Apan mipasidaan si Loreche nagsugod palang ang surge ug kinahanglan pa sila og dugang datos nga makapamatuod nga naka-develop na ang komunidad og immunity sa virus, kini kun bisan sa pagsaka sa mga kaso, magpabiling menus ang gidaghanon sa nalandig sa tambalanan.

Sa Lapu-Lapu City, nagtuo si Grace Carungay ang City Epidemiology and Surveillance Unit sa siyudad miingon nga misaka ang mga kaso human sa kapaskohan ug sa pag-igo sa bagyong Odette.

Niadtong Enero 4,2022 usa lang ka kaso ang natala apan niadtong Enero 9,2022 niabot na kini og 30 ka mga dugay bag-ong kaso.

Sa pagkakaron, miabot na og 75 ang aktibong kaso sa siyudad, napulo ang naa sa isolation facility, tulo ang naa sa tambalanan ug ang uban nag home quarantine lang.

Nagtuo si Carungay nga nikumpiyansa ang mga tawo atol sa kapaskohan ug dunay uban wala na manumbaling pagsuot og face mask tungod nakatutok sa pagbangon gikan sa bagyong Odette.— Romeo Limpangog /IBM (BANATNEWS)