Pagsita sa mgaminors gimando sa EOC
CEBU, Philippines — Gihangyo karon sa Cebu City Emergency Operations Center ang mga opisyales sa barangay ug kapolisan nga hingusgan ang pagsita ug pag-rescue sa mga minor nga wala magsul-ob og face mask, ug nakalapas sa curfew nga alas 10 sa gabii.
Nabantayan sa head sa EOC nga si Konsehal Joel Garganera nga dunay ubang mga barangay nga nakita ang mga bata nga wala nagsul-ob og face mask ug makita pa sa gawas panahon sa lawom sa kagabhion.
"Kining mga minor, i-rescue ni sila ug i-turn over didto sa barangay," suma pa ni Garganera.
Matud pa niya nga bisan luag na karon ang mga restriksyon, kinahanglan nga hatagan gyud og importansya ang pagsul-ob og face mask.
Kalabot usab sa curfew sa mga minors, giingong nalatid na kini sa ordinansa sulod na sa taas nga katuigan partikular na sa alas 10 sa gabii.
Nasayran nga nakadawat sila og report nga duna gihapoy mga minor ang maglaag-laag lapas sa maong oras.
Sa pagkakaron, ang regular nga oras sa curfew sa adults magpabilin nga alas 11:30 sa gabii sanglit kasagaran niini nagikan pa sa ilang mga trabaho, apan ang minors, kinahanglan nga alas 10: 00 sa gabii magsugod ang ilang curfew. —MEL (BANATNEWS)
- Latest
