402 ka balay tukoron sa Ponson Island

CEBU, Philippines — Niabot ngadto sa 402 ka balay ang tukoron diha sa Ponson Island sa Lungsod sa Pilar, Isla sa Camotes.

Ang maong mga balay alang sa mga biktima sa bagyong Yolanda niadtong tuig 2013 diin niadtong  higayona nakabaton og grabeng kadaot ang pipila ka mga lugar sa amihanang bahin sa Visayas.

Niadtong Nobiyembre 7, 2021 gipahigayon ang groundbreaking diha sa Lutaolutao, Cawit Pilar nga gitawag og Ponson Island Permanent Housing Project.

“Ang makadawat sa maong panimalay pagasutaon pinaagi sa pag doki-doki sa usa ka komitiba nga gimando ug aprobado sa National Housing Authority (NHA) nga pagamugnaon sa lokal nga pamunoan”, tipik sa post sa Facebook page sa Lungsod sa Pilar.

Ang matag balay aduna kini sukod nga 28 square meters nga tukoron diha sa 40 square meters nga luna.

Ang tibuok housing project adunay amenities sama sa basketball court, health center, tricycle terminal, parking areas, material and recovery facility training center ug uban pa.

Walo ka tuig ang nilabay, ubay-ubay pa gihapon nga mga biktima sa bagyong Yolanda dili lang sa amihanan apil na sa ubang bahin sa Visayas ang wala pa makadawat sa housing project nga gisaad sa gobiyerno.

Hinuon adunay uban nga nahatagan na ug adunay uban nga padayon pa nga gitukod. BDB (BANATNEWS)