Problema ni Ong

Sa bisan unsa nga kahugpongan di malikayan ang panagbingkil labi na gyud sa politika.

Sa nagdangadanga pa ang filing sa certificate of candidacy labihan ang pagkabahinbahin bisan sulod sa usa ka partido tungod sa mga nagbangga nga mga personal interest.

Dili malikayan nga dunay mga sakop sa usa ka partido nga manag-ilog sa posisyon nga gusto nilang daganan.

Ang Bando Osmeña Pundok Kauswagan (BOPK) ug ang alyansa sa Barug-PDP Laban, Kusug ug Panaghiusa wala makalingkawas sa intramurals sulod sa tagsa-tagsa nila ka grupo.

Sulod sa BOPK grabi ang panagtigi nilang Kongresista Bebot Abellanosa ug ABC President Franklin Ong kinsay angayang mamahimong kandidato pagkabise mayor.

Sa grupo sa Barug-PDP Laban duna say mga disgusto nga nahitabo hinungdan nga ang uban nilang mga sakop nihukom nga mag-independente.

Nahuman na ang filing sa certificate of candidacy niadtong Biyernes ug ang duha ka dominanting grupo sa politika dinhi sa dakbayan duna nay gituboy nga mga kandidato.

Apan siguradong dunay mga kabubut-on nga nasilo atol sa proseso paghusay sa kasamok diha sa partido aron makab-ot ang disisyon kinsay mamahimong opisyal nila nga mga kandidato.

Usa na niini ang kampo ni Abellanosa nga gikatahong wala mahimuot nga si Ong maoy gipili nga mamahimong runningmate ni kanhi konsehal Margot Osmeña.

Sigun sa akong tinubdan, daghan sa mga supporters ni Abellanosa ang mipadayag nga dili sila mosuporta ni Ong. Mas gipili sa mga dumadapig ni Abellanosa nga adto mopaluyo ni Bimbo Fernandez nga naila sab nga suod nga kaalyado sa BOPK.

Si Fernandez mipapili pagkabise mayor ubos sa Liberal Party apan mipadayag ni og suporta sa kandidatura ni Margot.

Ang problema ron sa BOPK mao nga mabahin ang boto alang sa ilang kandidato pagkabise mayor.

Kun di mahilot ang maong sitwasyon, magkatawa si Konsehal Raymond Garcia tungod kay mas makabintaha siya niini.

Kun matunga ang suporta sa BOPK tali ni Fernandez ug Ong natural mas dako og purohan nga modaog si Garcia.

Kun di makumbinsir sa BOPK ang ilang kaalyado nga si Fernandez pagsibog sa iyang kandidatura, dako og problemang sagubangon si Ong unsaon pagdaog sa eleksiyon.