Wanted nadakpan samtang namista
CEBU, Philippines — Usa ka habal-habal driver kinsa wanted sa kasong murder nga nagtago-tago sulod sa kapin usa ka tuig ang nasikop sa mga tinugyanan sa Anti-kidnapping Group Visayas Filed Unit sa may Barangay Cuanos, lungsod sa Minglanilla, niadtong Sabado.
Ang nadakpan mao si Romulo Alic, 34anyos, kinsa nasikop human nitambong ug fiesta sa Barangay Cuanos.
Si Alic nag-atubang og kasong murder gumikan sa giingong pagpatay niini kang Ronnie Lawas, niadtong Septembre 5, 2020.
Niadtong buwan sa Agosto naka-ipsot si Alic dihang gi-serbihan og warrant of arrest ug didto nanimuyo sa iyang paryente sa kabukiran.
Walay pyansa ang warrant of arrest ni Alic nga giisyu ni Judge Dennis Larrobis sa Branch 76 Regional Trial Court City of Naga niadtong Enero 28, 2021
Nangulo sa maong operation mao si Police Lieutenant Zosimo Ravanes Jr, Team Leader sa Anti-Kidnapping Group Visayas Field Unit.
Si Alic, nakit-an alas 7:30 sa gabii didto gawas sa balay sa iyang paryente, human kini nitambong ug fiesta didto sa Minglanilla.
Ang dinakpan niangkon hinoon nga maoy nipatay kang Lawas tungod sa matud pa niya panimawos human usab gipatay niini ang iyang pag-umangkon. MEL (BANATNEWS)
- Latest
