44 sikop sa gihimong SACLEO sa Consolacion
CEBU, Philippines — Nasikop sa kapolisan sa Lungsod sa Consolacion ang 44 ka tawo sa managlahing kalapasan ug nasakmit usab ang gituhuang shabu nga mibalor og P27, 200.
Kini atol sa gihimong Synchronized Anti-Criminality and Law Enforcement Operations (SACLEO) sa kapolisan niadtong Septiyembre 25, 2021.
Si Police Leutenant Fortunato Ecle, hepe sa Consolacion Police Station miingon nga duha sa 34 ka tawo nga ilang nasikop ang nalambigit sa ilegal nga drugas, 11 sa ilegal nga sugal, 1 sa paghupot og armas ug laing usa ang mitahan sa iyang armas sa gipahigayon nilang Oplan Katok.
Dugang 30 usab ka tawo ang ilang nadakpan sa kalapasan sa trapiko ingon man kalapasan sa gipatuman nga ordinansa sa lokal nga kagamhanan.
Samtang sa laing bahin padayon gihapon ang kawat-kawat nga pagduwa og basketball diha sa Dakbayan sa Talisay bisan pa og gidili kini karong panahona.
Suma pa ni Edwin Nierves pangu sa Taskforce sa Talisay nga higpit gihapon nga gibawal ang mga contact sports samtang naa pa sa pandemya aron kalikayan ang tinakdanay.
Gidugang ni Nierves nga nakadawat siya ug reklamo kabahin sa padayon nga pagduwa og basketball apan dili lang una niya itug-an ang lugar.
Base sa tahu nga nadawat sa ilang buhatan daghan na usab sa mga tawo ang wa na mituman sa health protocols.
Iyang gihangyo ang mga opisyales sa barangay nga maoy unang mobadlong sa mga tawo nga nagpabaya. —MEL (BANATNEWS)
- Latest