P55 milyong shabu nasakmit sa Oplan Limpyo Talisay
CEBU, Philippines — Miabot na sa 12 mil ka indibidwal nga nalambigit sa ginadiling drugas ang nadakpan sa kapulisan sa Dakbayan sa Talisay.
Samtang P55 milyones nga kantidad sa shabu ang ilang nasakmit.
Kining tanan nahimo sa dihang gisugdan ang Oplan Limpyo Talisay pinangulohan ni Police Lt. Col. Gerard Ace Pelare.
Matud pa ni Pelare nga ang Oplan Limpyo Talisay usa ka paagi sa pakigbatok sa ilegal nga drugas nga adto manukad sa ubos nga hut-ong sa katilingban.
Iyang gipasabot nga upat kini ka stratehiya nga ilang gigamit nga mao ang Relentless Arrest of Drug Personalities, Barangay Empowerment, Drug Rehabilitation ug Drug Clearing Operation.
Usa na dinhi mao ang pagpaduol nila sa katawham sa Barangay Tanke nga maoy giila nga gihugopan sa ginadiling drugas kaniadto.
Gani sa ilang stratehiya, ilang gihimo ang publikong pansayan sa lima ka mga sitio sa barangay kay mao sab kini ang hangyo sa katawhan sa maong lugar.
Gawas pa niana, ilang gihimo nga force multiplier o gitawag nga Barangay Defenders ang mga molupyo sa dapit nga maoy motabang kanila sa pagsumbong kung kinsa man ang padayon nga naa sa ilegal nga negusyo.
Nagpasalamat si Pelare sa komunidad nga nisalig kanila ingon man sa mga pribadong sektor nga nihatag og ayuda sa pagtuman sa ilang tinguha nga matubag ang hangyo sa katilingban.
Nagpasalamat usab sila og dako kang mayor Gerald Anthony “Samsam” Gullas nga walay hunong sa pagsuporta sa tanang programa sa kapolisan. —MEL (BANATNEWS)
- Latest