Mga trabahante sa Fooda nag-labor strike

CEBU, Philippines — Sobra 50 ka mga trabahante sa Fooda Savers Mart ang nagpahigayon og labor strike kagahapong adlawa, Septiyembre 17, 2021 sa gawas sa building sa kompaniya.

Nagsugod ang strike mga alas-5 sa buntag, dili lang didto sa General Maxilum Avenue branch sa Fooda apil usab sa ubang branches niini sa Talisay, Consolacion ug Barangay Guadaluep ug Kasambagan sa siyudad sa Sugbo.

“Di na maayo ang gihimo sa management, dili mi motoo nga mo close sila karong September 22 kay ni-file sila og financial loses. Sa panahon sa pandemic o dili pandemic dili sila ingon nga wala silay halin. Abli lang gihapon kay essential goods ang among gibaligya,” matud ni Juliet Devorte kinsa maoy presidente sa Fooda Savesmart Employees Union.

Si Doverte gi-terminate na sa trabaho niini sa kompaniya. Matod niya nga dili gusto sa Fooda nga masudlan sila og unyon sa mga empleyado.

“..nang hire sila og bag-o which is eight hours ang mga bag-o pero kaming mga regulars nga 15 years, 12 years, 10 years (na sa serbisyo), four (4) hours ra (ang trabaho) so sakit kaayo sa maong kabubut-on nga regular mi unya ilisan mi og bag-o,” dugang ni Doverte.

Laing trabahante nga si Christopher Zapanta, usa ka salesclerk sa store operation nagkanayon nga mo lima na ka bulan sila nagtrabaho nga tag upat ka oras lang.

Ang financial loses tungod sa pandemiya maoy gihimong rason kun nganong gipamub-an ang ilang oras sa trabaho matod ni Zapanta.  “Ang reason kay alkanse man daw kay tungod sa pandemic financial loses. Kung alkansi sila nganong mag-hire man sila?” pangutana ni Zapanta.

Ang labor strike sa maong mga trabahante, nagsugod sa alas 5 sa buntag kagahapon ug sumala sa mga empleyado andam sila mopahigayon niini matag adlaw hangtod nga makig-atubang kanila ang management sa Fooda.

Ang Fooda una na kining nianunsyo nga manirado na sila inig Septembre 22, 2021.

Sa pagsulat niiining balita wala pa makuha sa Banat News ang habig sa maong establisamento kalabot sa mga pasangil ug pagpahigayon og labor strike sa mga empleyado niini. —IBM (BANATNEWS)