Nagparehistro sa COMELEC niubos og 50 porsiyento

CEBU, Philippines — Niubos og sobra singkwenta porsyento ang nagparehistro sa nagkadaiyang buhatan sa Comelec sa isla sa Sugbo human nga gipaubos sa Modified Enhanced Community Quarantine (MECQ) ang tri-cities, Cebu, Mandaue ug Lapu-lapu apil na ang dili momenus 11 ka mga local government units sa lalawigan sa Sugbo.

Sa tibuok bulan sa Agosto, ang tri-cities gipaubos sa MECQ samtang niadtong Agosto 10 gipaubos usab sa MECQ ang Minglanilla, Samboan, Sibonga, Argao, Cordova, Consolacion, Liloan, Talisay, Carcar ug Naga city.

Ang maong mga lungsod ug syudad, dunay daghan nga populasyon.

Matod ni Atty. Lionel Marco Castillano ang Cebu Provincial Election Supervisor nga ningminus ang nagparehistro tungod kay sirado man ang mga opisina sa Comelec niadtong panahona.

Nagkanayon si Castillano, dili momenus 3, 000 ang matala nga magparehistro sa 54 ka Comelec offices lukop isla sa Sugbo apil ang tri-cities, apan human gipaubos sa MECQ ang tri-cities apil na ang 11 ka LGUs, anaa na lang sa 700 average ang gidaghanon sa mga nagparehistro matag adlaw.

Base sa polisiya sa Comelec kaniadto, suspendido ang voter’s registration sa mga lugar nga gipaubos sa MECQ.

“Dako ang pag drop pag MECQ kay before if mag MECQ close ang Comelec offices kay we don’t want nga mahimong source sa pagkatap sa virus ang among offices” matod ni Castillano.

Apan niadtong Septiyembre 6, gitugot na sa Comelec ang pagpahigayon og balik sa voter’s registration sa mga lugar nga gipaubos sa MECQ.

Matod ni Castillano, sa pagkakaron nidaghan daghan na ang nagparehistro hilabina ang satellite registration sa mga malls.

“dako na ang pagsaka, sa una mga 200 ra karon kay 300-400 a day” matod ni Castillano.

Ang pagparehistro sa mga malls magpadayon hangtod sa kataposang adlaw sa voter’s registration period karong Septiyembre 30, 2021.

Matod ni Castillano dili na mahimo nga i-extend pa ang registration period tungod kay adunay timeline nga gisunod ang Comelec pagpangandam sa umaabot nga piniliay sa 2022.

Base sa uwahing datus sa Comelec sukad Agosto 2 hangtud Septiyembre 11, mokabat na sa 26,309 ang na proseso nga application para sa voter’s registration lukop isla sa Sugbo. MEL (BANATNEWS)