Cebu City modawat na og balik og aplikasyon sa Balik Pasada Permit
CEBU, Philippines — Karon nga gipaubos na pagbalik sa general community quarantine(GCQ) ang Siyudad sa Sugbo gikan sa Septiyembre 8 hangtud sa 30, 2021 ang buhatan ni Cebu City Councilor James Anthony Cuenco ug ang Cebu City Jeepney Task Force kinsa si Cuenco maoy chairman modawat na pagbalik og aplikasyon sa Traditional Public Utility Jeepneys (TPUJ) Balik Pasada Permit.
Sayo pa, dihang gipaubos sa modified enhanced community quarantine (MECQ) ang Cebu City gikan sa Agosto 1 hangtud 31, 2021 ug nalugwayan gikan sa Septiyember 1 hangtud 7, 2021 nihunong sa pagpanawat og aplikasyon ang buhatan ni Cuenco.
Kaniadto usa sa mga rekisitos nga gipangayo sa siyudad sa mga mo-apply sa Balik Pasada Permit mao ang negative result sa swab test karon kinahanglang fully vaccination ang drayber ug dili na kinihanglan ang swab test result.
“Starting tomorrow balik na pod ta kay daghan na daw og backlog, daghan nag-apply. That’s why we have kanang drive-thru karon to accommodate them”, matud ni Cuenco.
Temporaryo usab nga giwagtang ang pagtambong sa mga drayber og seminar nga apil gihapon sa rekisitos sa pag-apply sa Balik Pasada Permit aron malikayan ang pagtapok sa mga tawo.
“Kaning mga driver who have not yet been issued a permit kahibawo na sila tanan sa mga guideline nato, and of course individually tagaan man na sila og instructions so okay na siguro nga dili nalang nato i-undergo og seminar”, padayag ni Cuenco.
Ang mga drayber ug operators kon makapasar sa tanang rekisitos nga gikinahanglan maisyuhan sila og Balik Pasada Permit aron makabiyahe na.
Gibana-banang dul-an sa 2,000 ka TPUJs ug modernized jeepneys ang nagdagan sa Siyudad sa Sugbo.
Walay limit ang ilang pagdawat karon og aplikasyon ilabi na nga nibalik na sa GCQ ang quarantine status sa Cebu City ug daghan na usab nga mga establisamento ang mag-abli ug gikinahanglan gyud ang transportasyon. —BDB (BANATNEWS)
- Latest
