Indian, angkas gidaro sa truck; truck diriyot molayat sa flyover

CEBU, Philippines — Patay diha-diha ang usa ka Indian national ug ang angkas niini nga menor de edad nga babaye human sila gidaro sa dagkong mga sakyanan diha sa N. Bacalso sa Barangay Lawaan 1, Dakbayan sa Talisay niadtong Martes sa gabii. Ang namatay mao si Hardeep Singh, 30-anyos nga taga Barangay Linao, nagmaneho sa motorsiklo ug angkas niini nga si Jennifer Dacumos, 17, taga Barangay Jaclupan sa nahisgutang siyudad.

Si Police Corporal Jerryl Bulandres, traffic investigator nagkanayon nga ang barangay tanod nga si Gasper Tañada nakakita sa panghitabo.

Giingong ang mga sakyanan nagbiyahe sa parehong direksiyon paingon sa north ug pag-abot diha sa lugar nga nahitaboan gidaro ang mga biktima sa trailer nga gimaneho ni Anthony Llego Alvis, 45, taga Barangay Tinaan, Dakbayan sa Naga.

Si Dacumos nalagpot kini diha sa karsada ug ang ulo niini nalatayan sa ligid sa 10-wheeler truck nga gimaneho ni Mofil Canape Pitogo, 30, taga Barangay Looc, Dakbayan sa Lapu-Lapu.

Matud ni Bulandres nga wala makabantay si Alvis sa mga biktima hinungdan nga iyaha kining naigo.

Si Pitogo giingong wala usab kini kabantay ug nakalitan na lang kini nga napasok na sa ligid sa iyang gimanehong truck ang ulo ni Dacumos.

Si Alvis ug Pitogo gitanggong kini karon diha sa detention cell sa Talisay City Police Station.

Sa laing bahin, nilungtad og siyam ka oras ang pagkabara sa trapiko hangtud nga nakuha sa mga personnel sa Traffic Enforcement Agency of Mandaue (TEAM) ang nakaali nga 10-wheeler truck nga nalambigit sa aksidente pasado alas 8:00 sa gabii niadtong Martes ug alas 5:40 na kagahapon sa buntag nahuman ang clearing operation niini.

Si Police Staff Sergeant Ruben Dayon, imbestigador sa Traffic Enforcement Unit (TEU) sa Mandaue City Police Office (MCPO) nagkanayon nga ang10-wheeler truck gimaneho kini ni James Jayme Lavador, hingkod ang panuigon adunay kargang sinako nga feeds nagbiyahe kini paingon sa norte ang nilikay paingon sa tuo ug diriyot nilahos sa flyover diha sa Barangay Maguikay aron dili mabangga sa SUV nga gimaneho ni Mikyong Choi, Korean national kinsa ni-counter flow.

Ang maong SUV giingong niigo kini sa motorsiklo nga gimaneho ni John Herrera, hingkod ang panuigon kinsa nagbiyahe usab diha sa lugar. —Romeo T. Limpangog/BDB (BANATNEWS)